Tókst að ljúka 34 milljarða fjármögnun
Setja bókamerki
Samherji fiskeldi ehf., dótturfélag Samherja hf., hefur lokið fjármögnun fyrsta áfanga Eldisgarðs, nýrrar landeldisstöðvar við Reykjanesvirkjun, með útgáfu nýs hlutafjár og sambankaláni, að því er segir í tilkynningu á vef Samherja.
Fram kemur að fjármögnun fyrsta áfanga nemur 235 milljónum evra, jafnvirði 34 milljarða króna. Verkefnið er stærsta fjárfesting félagsins frá upphafi.
Jarðvegsframkvæmdir við Eldisgarð hófust í október 2024 og er landeldisstöðin staðsett í auðlindagarði HS Orku við Reykjanesvirkjun með aðgang að 100% endurnýjanlegri orku frá virkjuninni sem þar er. Stöðin verður byggð í þremur áföngum.
Þegar lokið verður við að reisa fyrsta áfanga eldisstöðvarinnar mun hún framleiða 10.000 tonn af slægðum laxi en stefnt er að því að taka stöðina í notkun á fyrsta ársfjórðungi 2027. Áætlað er að eitt hundrað ný störf verða til í stöðinni og annar eins fjöldi afleiddra starfa.
Fullbyggð eldisstöð mun ná framleiðsluafköstum upp á 30.000 tonn á ári, en til stendur að nýta hliðarafurðir sem falla til við framleiðsluna innan auðlindagarðs HS Orku.
Byggir á reynslu úr Öxarfirði
„Það er afar ánægjulegt að fjármögnun nýju landeldisstöðvarinnar, Eldisgarðs, sé í höfn. Innlendir og erlendir bankar og fjárfestar sýna okkur mikið traust með sinni þátttöku. Við settum okkur skýrt markmið strax í upphafi að fá utanaðkomandi fjárfesta að þessu verkefni og það hefur nú náðst. Við væntum þess að landeldi á Íslandi skili umtalsverðri hagsæld fyrir þjóðarbúið, rétt eins og íslenskur sjávarútvegur hefur gert undanfarna áratugi,“ segir Þorsteinn Már Baldvinsson, forstjóri Samherja og stjórnarformaður Samherja fiskeldis, í tilkynningunni.
„Eldisgarður byggir á reynslu okkar af landeldi í Öxarfirði. Frá árinu 2023 höfum við fjárfest í stöðinni í Öxarfirði fyrir rúmlega fjóra milljarða króna. Sú fjárfesting fólst í stækkun og innleiðingu á nýrri tækni sem verður notuð í Eldisgarði. Árangurinn af þessum breytingum hefur ekki látið á sér standa og styrkir væntingar okkar um rekstur nýju landeldisstöðvarinnar,“ segir Þorsteinn Már.
Vekur hann athygli á því að teymi hafi unnið í langan tíma að undirbúningu þessa stóra og fjárfreka verkefnis og þannig lagt grunninn að þvi sem Þorsteinn Már telur verða landaledi í fremstu röð á heimsvísu.
„Ég er afskaplega stoltur af starfsfólki Samherja á þessum tímamótum og við teljum okkur vel í stakk búin að takast á við margfalt stærra landeldi,“ segir hann.
Stækkuðu hlutafjáraukninguna
Í tilkynnignunni segir að fjármögnun Eldisgarðs hafi verið tvíþætt. Annars vegar var um að ræða útgáfu nýs hlutafjár í Samherja fiskeldi ehf. upp á 125 milljónir evra og hins vegar sambankaláni upp á 110 milljónir evra.
Vegna mikils áhuga á verkefninu var ákveðið að auka umfang hlutafjárútgáfunnar og leggja þá grunn að næsta áfanga í uppbyggingu landeldisstöðvarinnar. Bæði innlendir og erlendir fjárfestar taka þátt í þessari stækkun útgáfunnar og er ráðgert að henni ljúki fyrir lok maí næstkomandi.
Greint er frá því að Samherji hf., sem er í dag eigandi 99% hlutafjár í Samherja fiskeldi, mun leggja til um helming hlutafjáraukningarinnar á móti fjárfestingu frá hópi fjárfesta. Þar er um að ræða AF3 slhf. (framtakssjóð í rekstri Alfa Framtaks ehf.), CCap (hollenskt fjárfestingarfélag í fjölskyldueigu) og Snæból ehf. (íslenskt fjárfestingarfélag í fjölskyldueigu). Sambankalán uppá 110 milljónir evra er leitt af Íslandsbanka með þátttöku Landsbankans, Nordea og Eksfin – Eksportfinansiering i Noregi.
Fyrirtækjaráðgjöf Íslandsbanka og Arctic Securities í Osló voru ráðgjafar Samherja fiskeldis í fjármögnunarferlinu.
Birt hefur verið kynningarmyndband vegna áforma Samherja fiskeldi ehf.
Friðarviðræður gætu hafist í kvöld
Var boðið embætti lögreglustjórans á Austurlandi
Ummæli ráðherra misráðin í miðju ferli
162 ný leikskólapláss í borginni
Sex hæða fjölbýlishús rísi á Garðatorgi
Vill Fossvogsbrú í endurmat
Má ekki vera geðþóttaákvörðun sveitarfélaga