Varðskip Landhelgisgæslunnar þurfa að sigla út úr íslenskri lögsögu og alla leið til Færeyja til að sækja olíu því eldsneyti er of dýrt á Íslandi. Gæslan gæti ekki staðið straum af kostnaðinum sem myndi fylgja því að fylla á skipin hér á landi. Þetta segir Georg Kr. Lárusson forstjóri Landhelgisgæslunnar í samtali við Aríel Pétursson, þáttastjórnanda hlaðvarpsins Sjókastsins.
Landhelgisgæslan fylgist vel með heimsmarkaðsverði olíu til að þaulnýta það fjármagn sem þeim er úthlutað. „Við höfum það hlutverk að nýta peninginn sem allra best og mér ber sú skylda að kaupa hagkvæmustu og öruggustu vörur sem kostur er á,” segir Georg, „þar á meðal olíu.” Jafnvel þótt siglingin sé talin með segir hann að það geti munað því sem samsvari kaupverði á fjögurra herbergja íbúð í Reykjavík að fylla á í Færeyjum í stað þess að kaupa olíuna á Íslandi.
Landhelgisgæslan er ekki undanþegin virðisaukaskatti við kaup á eldsneyti en Georg segir að það myndi jafnvel ekki breyta miklu þó svo væri. Álagning olíufélaga á Íslandi sé svo há að það myndi samt sem áður borga sig að leita til Færeyja. Væri gæslan skikkuð til að skipta við íslensk olíufyrirtæki myndi það sliga starfsemina. „Við bara getum það ekki,” segir Georg, „og undir minni stjórn munum við ekki gera það.”
Sjá má viðtalið við Georg í heild sinni hér fyrir neðan en umræða um olíuverð hefst þegar 54 mínútur og 54 sekúndur eru liðnar af þættinum. Einnig er hægt að hlusta á þáttinn á Spotify.