Tesla á Íslandi frumsýnir í dag pallbílinn Cybertruck. Sýningin er hluti af „Cybertruck Odyssey“ þar sem bifreiðin verður á ferðalagi um Evrópu.
Mun Cybertruck hafa viðkomu í Vatnagörðum 24 fram að mánudeginum 7. júlí. Af fréttatilkynningu frá Tesla má ráða að ekki verði í boði, að svo stöddu, að reynsluaka pallbílnum. Hins vegar geta áhugasamir prófað aðrar bifreiðar frá framleiðandanum, þ.e. Model S, Model 3, Model X og Model Y.
Cybertruck hefur vakið mikla athygli á heimsvísu en kaupendur í Bandaríkjunum fengu fyrstu eintökin af bifreiðinni í hendurnar í nóvember á síðasta ári.
Pallbíllinn vegur 3,1 tonn, getur rúmað rösklega 3.400 lítra af farangri, kemst allt að 750 km á einni hleðslu, og er svo lítið sem 2,7 sekúndur úr kyrrstöðu í 100 km/klst. Þá er dráttargeta Cybertruck allt að 4.990 kg.