Kia með flesta nýskráða fólksbíla

Nýjustu tölur Samgöngustofu og Bílgreinasambandsins sýna að Kia er mest selda fólksbílamerkið á íslenska markaðinum það sem af er þessu ári.

Í nóvember höfðu samtals 1.302 Kia-bílar verið seldir sem jafngildir 13,8% markaðshlutdeild. Þar á eftir kemur Toyota með 1.281 selda bíla og 13,6% markaðshlutdeild en í þriðja sætinu hafnar Hyundai með 1.111 bíla og 11,8% hlutdeild.

Þegar mánaðartölur ársins eru skoðaðar sést að Kia byrjaði árið nokkuð rólega á meðan Toyota var á mikilli siglingu. Salan hjá Kia komst hins vegar á mjög skrið yfir sumarmánuðina og hefur dugað til að viðhalda forskotinu þó svo að Toyota hafi selst betur undanfarna mánuði. Staðan gæti breyst þegar sölutölur desembermánaðar liggja fyrir enda aðeins 21 bíll sem aðskilur Kia og Toyota í toppslagnum.

Í tilkynningu frá Kia kemur fram að um verulegan viðsnúning sé að ræða en á síðasta ári var merkið með 11,8% markaðshlutdeild. Greinilegt er að sviptingar hafa orðið á íslenskum bílamarkaði en Tesla, sem var söluhæsta merkið í fyrra, seldi 3.000 bifreiðar á síðasta ári en hefur selt 476 nýskráða bíla það sem af er þessu ári og hafnar því í sjötta sæti yfir vinsælustu merkin í ár.

Sést það vel á tölunum að mikil ró er yfir markaðinum en á fyrstu 11 mánuðum síðasta árs voru nýskráðir bílar 16.006 talsins en eru nú 9.373 samanlagt.

Langmest selst af rafbílum, og tvinn- eða tengiltvinnbílum og saman mynda þessir flokkar 84% af markaðinum í ár en voru 91% á sama tíma í fyrra. Ef flokkað er eftir módelum hefur Dacia Duster selst best, en Kia Sportage lendir í öðru sæti og Tesla Model Y í því þriðja.

Forsala EV3 fer vel af stað

Í tilkynningu Kia er haft eftir Kristmanni Frey Dagssyni sölustjóra að framhaldið lofi góðu fyrir merkið og mikil eftirvænting sé fyrir frumsýningu Kia EV3 í janúar næstkomandi. „Nú þegar hefur forsala EV3 farið fram úr væntingum á Íslandi og nýjustu Kia bílarnir hafa vakið verðskuldaða athygli fyrir nútímalegt útlit.“

Á heimsvísu hafði Kia selt 262.426 bifreiðar í nóvember sem er 0,8% aukning miðað við sama tímabil í fyrra. Er það Kia Sportage sem leiðir söluna og hafa meira en 46.000 bifreiðar þeirrar gerðar selst það sem af er árinu.

Til að fagna góðum árangri efnir umboðið á laugardag til viðburðar sem fengið hefur yfirskriftina Litlu jól Kia. Verður jólastemning í sýningarsalnum að Krókhálsi 13 þar sem gestir geta fengið að kynna sér nýjustu bílana frá Kia.

• Blogga um frétt