Rannsóknir sýna að hreyfing hefur mikil og góð áhrif á líkamlega og andlega heilsu. Flestöll finnum við hvað það gerir okkur gott að fara út og hreyfa okkur. Það er manneskjum eðlislægt að vera úti og njóta útivistar, anda að sér fersku lofti. Með reglulegri útivist bætum við líkamlegt form og aukum andlega vellíðan. Sýnt hefur verið fram á að félagslegur stuðningur er mjög mikilvægur. Hringja í vin, vera í hópi og fá stuðning frá öðrum getur gert gæfumuninn fyrir suma til að fara út og hreyfa sig.

Í Ferðafélagi barnanna, sem er deild innan Ferðafélags Íslands, settu börnin sjálf sér reglur þegar félagið var stofnað fyrir rúmum 10 árum. Þær reglur eru afar góðar og geta svo sannarlega átt við útivist og hreyfingu fullorðinna.

Allir geta farið í ferðalag

Við viljum gjarnan hafa vin okkar með

Við viljum taka þátt í að skipuleggja ferðina

Okkur langar að ganga á undan og ákveða hraðann

Við viljum hafa tíma til þess að leika og upplifa spennandi hluti

Við viljum hafa tíma til að tala um það sem fyrir augu ber

Við viljum fá eitthvað gott þegar takmarkinu er náð

Við viljum hafa það notalegt á kvöldin þegar við erum að gista

Við viljum ekki vera köld, blaut eða hrædd.

Ásamt jákvæðum áhrifum á líkamlegt from fylgir því mikil andleg vellíðan að vera úti og njóta útsýnis og útiverunnar. Núna þegar vorið er fram undan gleður líka margt nýtt augað á hverjum degi. Plöntur stinga upp kolli og farfuglarnir koma til landsins og það örvar og gleður sálartetrið. Ekki síst við þær aðstæður sem nú hafa verið í samfélaginu sl. ár er mikilvægt að leita eftir stuðningi og styðja um leið aðra. Það er mikilvægt að muna að gott líkamlegt form og andleg líðan er mikilvæg til að komast í gegnum þá erfiðleika sem tengjast Covid-19. Hreyfing og útivist hefur afar jákvæð áhrif á andlega líðan okkar.

Ásamt jákvæðum áhrifum á líkamlegt from fylgir því mikil andleg vellíðan að vera úti og njóta útsýnis og útiverunnar. Ljósmynd/Ferðafélag Íslands

Fjölbreytileiki útivistar

Fjölbreytileiki útivistar og afþreyingar tengdri hreyfingu úti í náttúrunni hefur líklega aldrei verið meiri. Fólk hjólar, gengur, hleypur, skíðar, siglir, ríður út og þannig mætti lengi telja. Öll hreyfing er af hinu góða.

Okkur líður vel ef við hreyfum okkur á hverjum degi. Það er ekki aðeins form okkar sem verður betra – beinabyggingin styrkist og liðirnir mýkjast, vöðvakrafturinn í fótunum eykst, jafnvægið batnar og hættan á að detta og fótbrotna minnkar. Flestir hafa tekið eftir því, að með því að stunda líkamsrækt, jafnvel á hóflegum hraða, örvast blóðrásin í líkamanum; Þessi líkamlega áreynsla losar svokölluð endorfin sem gera það að verkum að við slökum á og finnum til vellíðunar.

Nú er kjörinn tími þegar vorið er fram undan til að reima á sig skóna og fara út og hreyfa sig.