Ferðalög | Ferðaráð | mbl | 10.4.2023 | 7:00

5 bestu ferðaráðin fyrir foreldra

Ljósmynd/Unsplash/Xavier Mouton

Lífið tekur sannarlega miklum breytingum með foreldrahlutverkinu. Það eitt að fara út í búð með barn krefst mun meiri skipulagningar. Tilhugsunin um að ferðast með barn getur því verið yfirþyrmandi, enda margt sem þarf að huga að.

Ferðavefur Travel + Leisure tók nýverið saman bestu ferðaráðin frá sérfræðingum sem eru staðföst á því að hægt sé að eiga farsælt og afslappandi fjölskyldufrí.

1. Fáðu börnin til að taka þátt í skipulagsferlinu

Hér er ekki verið að stinga upp á því að setja landakort fyrir framan börnin og biðja þau um að benda á næsta áfangastað, þó það hljómi skemmtilega.

Foreldrar eru hvattir til að leyfa börnunum að taka þátt í að skipuleggja ferðalagið áður en haldið er af stað. Til dæmis væri hægt að útbúa minniskort með skemmtilegum staðreyndum um staðina sem þið munuð ferðast á, eða elda uppskrift frá áfangastaðnum saman.

2. Nýttu ferðalög sem tækifæri til menntunar

Ferðalög til nýrra staða víkka sjóndeildarhring okkar og opna hugann, og það á ekki síður við um börnin okkar. Með því að fá börnin til að taka virkan þátt í skipulagningu, athöfnum og skoðunarferðum á nýjum slóðum eykur þú fræðslustig ferðarinnar til muna.

Ljósmynd/Pexels/Tatiana Syrikova

3. Íhugaðu að nota ferðaþjónustufyrirtæki

Það að skipuleggja ferðalag með fjölskyldunni er ekki einungis tímafrekt heldur getur það orðið mikill streituvaldur ofan á þétta dagskrá foreldra. Að nota ferðaþjónustufyrirtæki getur létt á álaginu og gert upplifunina í heild sinni ánægjulegri.

4. Fáðu litla ferðalanga til að pakka í tösku

Það eykur bæði spennu og ánægju fyrir alla, allt frá ungum börnum til unglinga, að pakka sjálfir í tösku því dóti sem þau vilja hafa með. Það þarf ekki að vera meira en lítill bakpoki með nokkrum leikföngum eða litabók.

5. Hafðu nóg af snarli meðferðis

Ef þú hefur pakkað nógu snarli til að fæða heilt fótboltalið, þá ertu líklega með nóg af snarli fyrir eitt barn sem er á leið í stutta flugferð eða bíltúr. Hungur gerir allt erfiðara svo þú vilt klárlega forðast það eins og heitan eld.