Gönguleiðin um Laugaveginn, sem liggur á milli Landmannalauga og Þórsmerkur, er ein vinsælasta gönguleið landsins bæði meðal heimamanna og ferðamanna. Leiðin er um 55 km löng og þykir einstaklega fögur, en gengið er í gegnum fjölbreytt landslag sem inniheldur meðal annars líparítsvæði, hrafntinnuhraun, háhitasvæði, vötn, sanda og skóga.
Það kemur því ekki á óvart að Laugavegurinn hafi á dögunum verið valinn besta gönguleiðin í Evrópu, en listann prýða 13 spennandi og ævintýralegar göngur sem sérfræðingar hjá 57Hours mæla með.
„Laugavegurinn liggur frá jarðhitalindum Landmannalauga að friðlandinu Þórsmörk sem situr undir virku eldfjalli. Hin 55 kílómetra Laugavegsleið er nokkurra daga gönguleið á Íslandi sem leiðir göngugarpa í gegnum stórbrotið landslag sem inniheldur meðal annars eldfjöll, hraun, jökla, hveri, svartan sand, vötn, jarðhitalaugar og svo margt fleira.
Gangan hefst á Landmannalaugarsvæðinu, þekkt fyrir litrík líparítfjöll, og endar í Þórsmörk. Á leiðinni munt þú upplifa nokkra af merkustu stöðum Íslands, þar á meðal jarðhitasvæðið Hrafntinnusker, Fjallabak og Eyjafjallajökul.
Gönguleiðin er vel merkt með vörðum og skiltum og á leiðinni eru fjallaskálar og tjaldstæði þar sem göngufólk getur hvílt sig og gist. Mikilvægt er þó að vera meðvitaður um að veðrið á Íslandi getur verið mjög óútreiknanlegt, stundum upplifir þú allar fjórar árstíðirnar á einum degi, svo vertu alltaf viðbúinn skyndilegum breytingum í veðri,“ er skrifað í umsögn um gönguleiðina.