Ferðalög | Ferðalög innanlands | mbl | 7.6.2024 | 20:00

Snjókoma í júní vekur heimsathygli á TikTok

Veðrið hefur vakið þó nokkra athygli á TikTok. Samsett mynd

Gular og appelsínugular viðvaranir eru sannarlega ekki það sem landsmenn óska sér í byrjun júní, en óveðrið sem hefur geisað á Norðausturlandi síðan á mánudag hefur verið áberandi í fjölmiðlum.

Appelsínugular viðvaranir áfram í gildi

Allt að tveggja metra háir skaflar

Taka stöðuna á lokunum um hringveginn á hádegi

Veðrið hefur þó ekki einungis vakið athygli hér á landi heldur einnig erlendis. Á samfélagsmiðlinum TikTok hafa birst þó nokkur myndskeið, bæði frá Íslendingum og erlendum ferðamönnum, af vetrarfærðinni.

„Við vildum bara sjá lunda“

Hjónin Tanika og Noah hafa verið á ferðalagi um Ísland í nokkra daga og lentu í leiðindaveðri, en þau birtu myndskeið af vetrarfærðinni með yfirskriftinni: „Við vildum bara sjá lunda og þetta er það sem við enduðum í.“

Þó nokkrir hafa skrifað ummæli við myndskeiðið, en einn notandi skrifaði: „Íslenskt veður: Búist við hverju sem er, hvenær sem er, og öllu í einu. Veturinn yfirgefur aldrei Ísland. Þú getur upplifað allar árstíðirnar í einu“ á meðan annar skrifaði: „Það er ekkert sumar á Íslandi, bara vetur, vor og haust.“

Þá var íslenskur notandi sem skrifaði: „Pabbi minn segist aldrei hafa upplifað svona júníveður á ævinni. Það snjóaði líka um miðjan maí í fyrra en það var ekkert miðað við þetta. Þetta hefur verið svo stressandi vegna kindanna og hestana.“