Liðsmaður Backstreet Boys í brúðkaupi á Íslandi

Tónlistarmaðurinn og Íslandsvinurinn Howie Dorough, liðsmaður hljómsveitarinnar Backstreet Boys, deildi í gær á samfélagsmiðlum huggulegum myndum af sér og eiginkonu sinni Leigh Anne í Bláa lóninu. 

Hjónin höfðu verið í fámennu brúðkaupi vina sinna sem haldið var á Íslandi fyrir nokkrum vikum á veitingastaðnum Ingólfsskáli á Suðurlandi, en veitingastaðurinn er þekktur fyrir einstakt víkingaþema í tignarlegum torfskála.

Fengu frábært veður í ferðinni

Brúðhjónin og brúðkaupsgestir fögnuðu svo á Reykjavík Edition hótelinu í Reykjavík. Veðurblíðan lék við Dorough og Anne á meðan þau skoðuðu sig um landið dagana fyrir og eftir brúðkaupið. Þau nutu líka íslenskrar matarmenningar og borðuðu meðal annars á veitingastaðnum Le Kock á Tryggvagötu í Reykjavík og á Moss á lúxushóteli Bláa Lónsins, The Retreat at Blue Lagoon.

Backstreet Boys héldu eftirminnilega tónleika hér á landi í apríl á síðasta ári. Fjölmargir tónleikagestir létu sig hverfa í nostalgíu síðustu aldarmóta en tónleikarnir, sem voru haldnir í Laugardalshöllinni, heppnuðust afar vel.

Frétt af mbl.is

Ertu pepp fyrir Backstreet Boys?

• Blogga um frétt