Það á að vera fínasta veður um helgina víða um land fyrir tjaldútilegur. Sérstaklega gott veður verður á Vesturlandi og Suðurlandi ef marka má veðurspá útileguvefsins Blika.is.
Ferðavefur mbl.is tók saman nokkur tjaldsvæði þar sem spáð er mjög góðu veðri um helgina.
Spáin í Reykholti á að fara upp í 20 stiga hita á laugardaginn og það á að vera heiðskýrt næstum því allan daginn. Veðrið á þó ekki að vera eins gott á sunnudaginn og þá er gott að vera bara inni í tjaldi eða í tjaldhýsinu.
Tjaldsvæðið í Reykholti er staðsett í þéttbýliskjarnanum að Reykholti. Svæðið er skjólgott og er rafmagn á svæðinu og leiksvæði fyrir börnin.
Ein besta veðurspáin fyrir helgina er á Skógum. Hitinn á að fara upp í allt að 19 stig á laugardag og á að vera heiðskýrt næstum því allan daginn. Á sunnudaginn er alveg eins gott að pakka saman snemma, það á ekki að sjást til sólar en hitinn á að vera í kringum 11 stig.
Tjaldsvæðið við Skógafoss er staðsett í nágrenni Skógafoss en þar er bæði heitt og kalt vatn.
Búist er við sól og 14 stiga hita á laugardaginn og á sunnudaginn er spáð 16 stiga hita og er gert ráð fyrir að það verði hálfskýjað.
Tjaldsvæðið Sælukot Árblik er hægra megin við þjóðveg númer 60 á leiðinni vestur á firði. Margir áhugaverðir staðir eru til að skoða í nágrenninu. Í Árbliki er góð sturtuaðstaða og þar er líka lítið eldhús fyrir þá sem vilja komast í slíkt. Losunaraðstaða er fyrir ferðasalerni. Rafmagnstenglar eru á tjaldsvæði.
Það á að vera mjög gott veður í Borgarnesi um helgina. Hitinn á að fara upp í 14 gráður á laugardaginn og ekki rigningardropi á ferð. Sólin lætur ekki sjá sig á sunnudaginn en hitinn fer þó upp í 15 gráður sem verður að teljast nokkuð gott.
Tjaldsvæðið í Borgarnesi er við þjóðveg 1 á leiðinni út úr bænum. Selerni og rafmagn er á svæðinu. Ef fólki fer að leiðast á tjaldsvæðinu er stutt í Borgarnes þar sem allt er til alls.