Ætli flestir geti ekki verið sammála um að fjölskyldufríið þarf að vera þægilegt og áreitið takmarkað. Fjölskyldan vill eflaust njóta menningar, greiðs aðgangs að útiveru og nægrar afþreyingar fyrir börnin á stað sem er ekki yfirþyrmandi sökum stærðar og fjölmennis.
Travel and Leisure mælir með smábæjum sem gætu verið eitthvað sem þú ættir að íhuga fyrir næsta ferðalag fjölskyldunnar:
Pals á Spáni
Þetta heillandi þorp frá miðöldum er í um 90 mínútna fjarlægð norður af Barcelona og kjörinn áfangastaður fyrir fjölskylduna. Fallegar sandstrendur eru í nálægð við bæinn og hægt er að fara með bát inn í víkur við strandlengjuna. Hægt er að heimsækja dæmigerðan katalónskan bæ þar sem börnin geta lært um búskap af gamla skólanum.
Hvar á að gista:
Travel and Leisure mælir með Mas de Torrent sem er uppgerður 18. aldar bóndabær, hótel með 39 herbergi. Á hótelinu er sundlaug, tennisvellir og önnur afþreying fyrir fjölskylduna, eins og stjörnuskoðun.
Val Gardena á Ítalíu
Í Val Gardena dalnum eru mörg lítil þorp. Hægt er að fara í klifur sem er sniðið að allri fjölskyldunni og í fjallahjólreiðar. Í dalnum er að finna Sellaronda, eina fallegustu hjólaleið í Evrópu. Saman getur fjölskyldan notið þess að skoða kastala eða fengið sér máltíð í svokölluðu fjalla-rifugio, sem eru fjallakofar staðsettir á tindum í kringum dalinn. Tindar sem eru á heimsminjaskrá UNESCO.
Hvar á að gista:
Hægt er að finna allt frá fimm stjörnu hótelum til notalegra gistiheimila, sem bjóða upp á lægra verð og meiri þægindi fyrir fjölskyldur. Travel and Leisure mælir með Gardena Grödnerhof, en á hótelinu er starfandi krakkaklúbbur, kvikmyndahús og klifurveggur.
Comporta í Portúgal
Comporta er lítill brimbrettabær með afslappað andrúmsloft. Bærinn er í um 1,5 klukkustunda fjarlægð frá höfðuborginni Lissabon. Á ströndinni er boðið upp á brimbrettakennslu fyrir börn og fullorðna. Í Sado Estuary-friðlandinu er að finna m.a. flamingóa, storka og höfrunga. Degi í bænum Melides gæti verið vel varið. Torgið í miðbænum er heillandi, hægt er að fá sér ís á Anguilla Surf Cafe og fara á Galé-ströndina.
Hvar á að gista:
Mælt er með dvöl á Quinta da Comporta hótelinu þar sem útsýnið nær yfir breiður af ökrum. Á hótelinu er hægt að fara í jóga, spa, sund og leigja reiðhjól. Hótelið hefur hlotið fjöldann allan af viðurkenningum.
Tæmandi lista er að finna á vefsíðu Travel and Leisure.