„Sikiley á mikið inni sem ferðamannastaður“

Upplifa og fræðast

Á þeim dögum sem svo fóru í hönd var farið víða um Sikiley. Þar má nefna Vall di Templi, Dal hofanna sem svo er kallaður. Þetta er einn af stærstu fornminjastöðum heimsins, en þarna var nýlenda sem Grikkir stofnuðu sex öldum fyrir Krist og varð ein af leiðandi borgum við Miðjarðarhaf. Á þessum stað er allt stórt í brotinu, eins og gerist víða annars staðar á Sikiley.

Í Sikileyjarferðinni sem hér segir frá var viðstaða í Giardini Naxos. Þar nærri, í klettum hárra fjalla, er bærinn Taormína; þekktur meðal Íslendinga fyrir að þar dvaldist Halldór Laxness fyrir tæpri öld þegar hann skrifaði Vefarann mikla frá Kasmír, þá frægu skáldsögu. Úr þessum bæ, frá rústum leikhúss Rómverja, sést vel yfir Messíanasundið til meginlands Ítalíu sem er aðeins fáeina kílómetra frá. Þarna nærri er eldfjallið Etna; 3.357 metra hátt. Er keilulaga og þannig ekki ólíkt til dæmis Heklu og Eldfelli, svo íslensk dæmi séu nefnd. Þetta er líka eitt af virkustu eldfjöllum heims og eldsumbrot þar eru nánast stöðug. Síðast gaus nú í júlí í Etnu, fjallinu sem er á heimsminjaskrá UNESCO, eins og margir fleiri staðir á Sikiley.

Ferðafærni Íslendinga verður sífellt meiri og tungumálakunnátta betri. Margir fara því um heiminn á eigin vegum, sem hefur þó ekki nema síður sé dregið úr áhuga fólks á skipulögðum ferðum með leiðsögn.

„Farþegar með Bændaferðum eru í vaxandi mæli fólk á miðjum aldri sem vill í utanlandsferðum sínum fara víða um; sjá, upplifa og fræðast. Mér finnst áhugavert að skipuleggja slíkar ferðir, sem kallar á að vera áður búin að kynnast vel aðstæðum og landi,“ segir Hófí. „Ég stýri fjölbreyttum ferðum og reyni líka að brydda upp á einhverju nýju; koma með spennandi áfangstaði. Og sama hvert leiðin liggur þá hlakka ég til sérhverrar ferðar, en þær skipulegg ég eins og reynsla og tilfinningin segja mér að farþegarnir vilji hafa hlutina.“

Fararstjóri í 40 ár

Tæp 40 ár eru síðan Hófí byrjaði sem fararstjóri hjá Bændaferðum, þá í félagi við Agnar heitinn Guðnason, þá tengdaföður sinn. Fólk úr sveitum landsins var þá gjarnan farþegahópurinn þegar ferðast var um Skandinavíu, Bretlandseyjar og norðurhluta Evrópu. Í fyllingu tímans komu svo inn ferðir um Ítalíu, Spán, og víðar.

„Ítalía hefur upp á margt að bjóða; þar eru áhugaverðir staðir eins og perlur á bandi. Flórens, Gardavatnið, Feneyjar, Róm, Caprí, Sardinía og Amalfíströndin. Af nægu er að taka. Af öðrum löndum í Evrópu þá hefur Króatía verið að koma sterk inn sem áfangastaður ferðamanna og þangað gera Bændaferðir út í vaxandi mæli,“ segir Hófí sem frá 2007 hefur verið búsett í Bæjaraskógi í Þýskalandi. Sambýlismaður hennar er Norberg Birnböck, sem í áratugi hefur verið rútubílstjóri í Evróputúrum Bændaferða. Ekur þar á rauðri rútu og kemst alltaf í áfangastað.