Ferðalög | Ferðalög erlendis | mbl | 8.12.2024 | 20:02

Hvert er best að fara í janúar?

Væri ekki gaman að yfirgefa myrkrið á Íslandi í janúar og fara að snorkla í sjónum við Dóminíska lýðveldið? Jared Lisack/Unsplash

Þegar jólaundirbúningurinn og brjálæðið er að ná hámarki láta eflaust margir sig dreyma um gott frí í sól og hita, jafnvel í janúar þegar allt fjörið er búið og myrkrið virðist engan endi ætla að taka.

Svo eru kannski einhverjir sem láta vaða og drífa sig í sólina eftir áramótin og þá eru hér fimm áfangastaðir – ekki Spánn – sem Travel and Leisure mælir með.

Los Cabos, Mexíkó

Los Cabos er á suðurodda Baja Kaliforníu sem tilheyrir Mexíkó. Í lok desember ár hvert flykkjast þangað gráhvalir, hnúfubakar og hvalháfar til að fjölga sér í hlýjum sjónum. Í Los Cabos er hægt að fara í hvalaskoðunarferðir í janúar.

Auk þess státar staðurinn sig af hvítum sandströndum, golfvöllum, næturklúbbum, verslunum og fjölda veitingastaða. Eitthvað til að halda ferðalöngum uppteknum dag og nótt.

Í lok desember flykkist fjöldi hvalategunda í sjóinn við Los Cabos til að eiga afkvæmi sín. David Nieto/Unsplash

Það er falleg í Los Cabos. Leosprspctive/Unsplash

Hver er ekki til í suðrænana stemningu í janúar? Miikka Luotio/Unsplash

Dóminíska lýðveldið

Dóminíska lýðveldið er á eyjunni Hispaniola sem er umkringd bæði Karíbahafinu og Atlantshafinu. Eyjan býr yfir miklum náttúrutöfrum, fjölbreyttu landslagi, plöntu- og dýralífi. Þar eru alls 29 þjóðgarðar, allt frá skýjaskóginum í Sierra de Bahoruco-þjóðgarðinum til galdrahellanna í Cotubanamá-þjóðgarðinum.

Við eyjuna er einnig að finna Montecristi-neðansjávarþjóðgarðinn þar sem hægt er að kafa og skoða kóralrifin.

Í janúar er loftslagið á eyjunni hlýtt og þurrt og því fullkomið fyrir þá sem vilja slappa af á ströndinni með suðrænan drykk við hönd.

Dóminíska lýðveldið. Loftslagið á eyjunni er fullkomið í janúar. Victor Rosario/Unsplash

Á eyjunni er fjölbreytt plöntu- og dýralíf. Juanca Paulino/Unsplash

Indland

Indland er fjölmennasta land heimsins þótt Ísland sé auðvitað „stórasta“ land í heimi. Makar Sankrati er vinsæl hátíð meðal hindúa og fer fram í kringum 14. janúar ár hvert. Hátíðin táknar lok vetrar og upphaf lengri daga. Þá hópast heimamenn upp á húsþök og taka þátt í svokölluðum flugeldabardaga.

Janúar 2025 er einnig sagður fullkominn tími til að upplifa stærstu trúarsamkomu í heimi, Maha Kumbh Mela, sem haldin er á tólf ára fresti í borginni Prayagraj.

Taj Mahal í Agra, Indlandi. Julian Yu/Unsplash

Hver myndi ekki vilja skreppa á rúntinn með þessum? C Rayban/Unsplash

Dúbaí

Janúar er frábær tími til að heimsækja Dúbaí. Veðrið er notalegt, minni raki er í loftinu og dagarnir líða í birtu hins endalausa vetrarsólskins. Flestir viðburðir í Dúbaí eiga sér stað yfir „kaldari“ mánuðina, þ.á.m vetrarhátíðin í Dúbaí. Stemningin á veröndum kaffihúsa og bara verður skemmtilegri með mildara veðri og minni mannfjölda.

Strendur eru ögn kaldari á morgnana og kvöldin en yfir daginn er þar full starfsemi og ýmislegt í boði.

Dúbí, eins og af annarri veröld, Christoph Schulz/Unsplash

Leigubílarnir bíða í röðum í Dúbaí. Hægt er að fara í úlfaldasafarí. Fernando Jorge/Unsplash

Patagónía

Patagónía, heimkynni skóga, jökla, fjalla og eyðimerkur, er staðsett á suðurodda Suður-Ameríku og nær yfir hluta Síle og Argentínu. Í janúar er ferðaþjónusta á svæðinu í fullum gangi, þrátt fyrir að vera ekki háannatími ferðamennskunnar. Sólríkir dagarnir eru langir og hentar áfangastaðurinn þeim sem vilja vera á ferðinni.

Vinsælt er að skoða Torres del Paine-þjóðgarðinn í Síle og Los Glaciares-þjóðgarðinn í Argentínu. Aðrar afþreyingar gætu verið eitthvað á borð við hvalaskoðun eða heimsókn á nautgripabúgarð fyrir aukna menningarupplifun.