Ferðalög | Ferðaráð | mbl | 27.1.2025 | 20:00

Viðskiptafarrými tekin yfir og fyrsta farrými úrelt

Fyrsta farrými er að verða úrelt samkvæmt Travel and Leisure og nú eru viðskiptafarrýmin tekin yfir. Andrea Natali/Unsplash

Á 21. öldinni hafa svokölluð viðskiptafarrými verið færð upp um gæði hjá fjölda flugfélaga. Áður fyrr voru viðskiptafarrými eins konar millibil milli annars farrýmis og fyrsta farrýmis. Í dag er því öðruvísi farið þar sem mörg af flugfélögum heimsins hafa afnumið fyrsta farrýmið og eru nú einungis með annað farrými og viðskiptafarrými. Á ferðavefnum Travel and Leisure var gerð úttekt á slíkum farrýmum.

Qatar Airways, löngum talið með mestu gæðin um borð. Skjáskot/Instagram

Qatar Airways

Miðausturlandafélagið Qatar Airways er gjarnan talið einn mesti lúxusferðamátinn. Í flugvél A350 eru 46 sæti á business class afmörkuð með skilrúmi svo farþegi getur notið fyllsta næðis. Farangur er í geymsluhólfum inni í rýminu svo farþegar geta auðveldlega teygt sig í hluti án þess að losa beltið. Maturinn er til fyrirmyndar og við innganginn er útdeilt náttfötum og inniskóm sem hægt er að smeygja sér í.

ANA 777-300ER „Herbergið“

Nýjasta viðskiptafarrými All Nippon Airways undirstrikar í raun hve úrelt fyrsta farrými er orðið. Farrýmið einkennist af svítum sem voru hannaðar af arkitektinum Kengu Kuma. Minimalísk hönnun með mjúkum sætum og einstaklega góðu plássi. Matseðillinn er heilnæmari en þekkist annars staðar og 24 tommu skjár fylgir hverri svítu.

Viðskiptafarrými japanska flugfélagsins All Nippon Airlines. Skjáskot/Instagram

Singapore Airlines

Lengsta flug sem í heimi er frá Newark til Singapore, með alls nítján klukkustundir í lofti. Sem betur fer er viðskiptafarrými félagsins, A350-900ULR, einnig eitt það þægilegasta. Hægt er að losa sætisbakið aftur svo sætið breytist í rúm. Hægt er að panta sér mat hvenær sem er meðan á fluginu stendur en matseðillinn er einn sá fjölbreyttasti í háloftunum.

JetBlue

Viðskiptafarrýmið Mint Studio fór fyrst í notkun 2021. Aflokað rými fyrir hvern farþega með góðu plássi. Rúmið í rýminu er nógu stórt til að bylta sér í svefni. Í sætisörmum eru vírlausir hleðslupúðar og hægt er að hreyfa sjónvarpsskjáinn eftir því í hvaða stellingu viðkomandi er. Matur og drykkir jafnast á við flotta bari og veitingastaði í New York. Eini ágallinn er að flugið er mjög takmarkað og er einungis flogið til London og nokkurra áfangastaða í Mið- og Suður-Ameríku.