Ferðalög | Ferðalög erlendis | mbl | 13.3.2025 | 8:00

Alls 71% ferðalanga sem ferðast einir eru konur

Konur er í sífellt meiri mæli að ferðast einar eða saman í hópum til að komast frá daglegu amstri. Briana Tozour/Unsplash

Kvenferðalöngum hefur farið fjölgandi undanfarin ár þar sem 71% ferðalanga sem ferðast einir eru konur, þar af eru 25% 65 ára og eldri, samkvæmt þróunarskýrslu Virtuoso, frá ágúst 2024.

Breytt samfélagsleg viðmið og aukið fjárhagslegt sjálfstæði gefur konum frelsi til að kanna heiminn. Þessi þróun hefur einnig leitt til þess að fleiri kvenkyns frumkvöðlar færa sig yfir í ferðaiðnaðinn.

Yngri konur ferðast einnig í meiri mæli. Holly Mandarich/Unsplash

Margar konur fá ekki tækifæri til að ferðast á yngri árum vegna ábyrgðarhluta í lífinu eins og hjónabands, barneigna, starfsframa og annarra félagslegra- og menningarlegra þátta.

„Það er vaxandi löngun til að kanna smærri og fallegri áfangastaði sem bjóða upp á ríka menningu, staðbundin tengsl og möguleikann á að uppgötva meira,“ segir Ellen Flowers, ferðabloggari hjá Perennial Style.

Margar kvenferðir hverfast í kringum áhugamál eins og listsköpun, hestaferðir og matreiðslunámskeið. Framtíðarhorfur í ferðamennsku sem tengist áhugamálum gefa til kynna að markaðurinn gæti náð veltu upp á 5,1 milljarð dollara árið 2025.

Konur hafa áhuga á ólíkri menningu og vilja gjarnan styðja við handverkskonur á þeim áfangastað sem farið er til. Ives Ives/Unsplash

Konur velja allt frá hreyfi- og ævintýraferðum yfir í menningalegri ferðir eða slökunarferðir. wang xi/Unsplash

Konur brjóta niður staðalímyndir

Konur hafa áhuga á að vita hvernig aðrar konur lifa og fá þannig betri skilning á menningu þeirra og aðstæðum með því að styðja við innlenda frumkvöðlastarfsemi kvenna og verja tíma með innlendum handverkskonum.

Í því samhengi segir Sarah Faith hjá Responsible Travel að vinsælustu kvennaferðirnar séu þær sem tengja saman ferðalanginn og kvenkyns íbúa á því svæði sem ferðast er til.

Konur á öllum aldri leita eftir ævintýrum, vilja ögra sér og kanna hið óþekkta. Fyrir margar er það persónulegt frelsi. Konur yfir fimmtugu sanna að leitin að spennu í lífinu renni aldrei út á dagsetningu.

„Það er vaxandi löngun til að kanna smærri og fallegri áfangastaði sem bjóða upp á ríka menningu.“ Wei-Cheng Wu/Unsplash

„Allt frá því að klöngrast niður kletta til gönguferða í afskekktu landslagi, eru þessir óttalausu landkönnuðir að brjóta niður staðalímyndir og sýna að hreyfiferðir eru fyrir alla.“

Slíkar kvennaferðir eru ekki einungis farnar af eldri konum, heldur eru þær alveg eins vinsælar meðal yngri kvenna. Stress daglega lífsins hefur gert það að verkum að yngri konur sækja einnig sífellt meira í heilsuferðir, eins og jógaferðir.

Þá hafa samfélagsmiðlar á borð við TikTok og Instagram ýtt undir ferðaáhuga yngri kynslóðar kvenna.