Ferðalög | Viðtöl | mbl | 1.3.2025 | 8:30 | Uppfært 9:17

„Mér finnst stundum eins og ég lifi í draumi“

Valentína Björk Hauksdóttir. Ljósmynd/Aðsend

Valentína Björk Hauksdóttir kann að njóta lífsins og búa sér til ný tækifæri. Hún er fædd og uppalin í Hrafnagilssveit á Norðurlandi en fluttist upp úr tvítugu til höfuðborgarinnar og starfaði sem flugfreyja hjá Play í rúmt ár. Hún segist alltaf hafa haft það bakvið eyrað að hana langaði að leita eitthvað lengra. Í dag starfar hún sem flugfreyja hjá Emirates og er búsett í Dubai, þar sem höfuðstöðvar flugfélagsins eru.

„Ég sá auglýsingu á samfélagsmiðlum þar sem Emirates var með opinn dag á Íslandi og ég ákvað í skyndi að mæta á hann. Eitt leiddi af öðru og ég fékk boð á námskeið hjá þeim og hófst það í byrjun ágúst árið 2023.“

Hvernig var þín upplifun af inntökuferlinu og hvernig er að vinna fyrir Emirates?

„Inntökuferlið er langt og strangt í hreinskilni sagt. Margir sem fara á opna daga hjá þeim hafa gert það áður og ekki komist inn. Það eru mörg skilyrði sem þarf að uppfylla ef maður vill komast inn hjá Emirates og þau eru með háar væntingar til þeirra sem sækja um. Þjálfunin er um það bil tveir mánuðir, alla virka daga og eru dagarnir langir. Þegar ég fór í starfsviðtal hjá þeim, þá var mæld bæði hæð og þyngd því þau eru með ákveðnar kröfur varðandi slíkt. Þau fara eftir BMI stuðli og hann er svo athugaður tvisvar sinnum í þjálfuninni svo að það er fylgst mjög vel með manni. Til að komast í gegnum þjálfunina þarf að taka henni mjög alvarlega, taka vel eftir í tímum og læra mikið heima. Það er farið yfir svakalega mikið efni á stuttum tíma, jafnvel þó að þetta séu tveir mánuðir. Ég tók verkleg og skrifleg próf nokkrum sinnum í viku. Mér þótti verklegu prófin oft vera stressandi en það var yfirleitt verið að prófa í efni sem var nýbúið að fara yfir og var mikil pressa að falla ekki. Sem betur fer gekk mér vel enda var ég með mjög góðum hópi í skólanum og hjálpuðumst við mikið að. Ég er ennþá í samskiptum við suma af bekkjarfélögum mínum og er ég mjög þakklát fyrir að hafa kynnst þeim.“

Valentína Björk lauk átta vikna þjálfun hjá flugfélaginu Emirates í september árið 2023. Ljósmynd/Aðsend

„Núna er ég búin að vera hjá þeim í eitt og hálft ár og ég er ennþá spennt fyrir vinnunni. Maður er alltaf að upplifa eitthvað nýtt og þetta er gríðarlega stórt tækifæri sem ég mun alltaf vera þakklát fyrir að hafa fengið. Ef ég ætti að lýsa upplifun minni hingað til þá er það eitt stórt ævintýri. Á sama tíma er þessi vinna virkilega krefjandi og alls ekki fyrir alla. Þetta er stórt stökk frá því sem ég var að gera og hef verið vön að gera. Sem dæmi eru flugin hjá Emirates yfirleitt löng, við fáum okkar hvíld og pásur en það er mikið álag á líkamann að vera svona lengi í flugvél. Sumir dagar eru erfiðari en aðrir en yfir það heila hef ég verið heppin og mín upplifun er mjög góð. Vinnan hefur gert mér kleift að kynnast svo ótrúlega mörgu nýju sem hefur gert mig að opnari manneskju. Ég hef ferðast á staði sem ég hélt að ég myndi aldrei koma til og tekist á við alls konar aðstæður.“

Valentína hefur komið til borg englanna. Ljósmynd/Aðsend

Hvernig finnst þér að búa í Dubai?

„Dubai hentar mér vel og það kom mér á óvart hvað mér líkar vel að búa hér. Hugmyndirnar sem ég hafði um þessa borg voru eiginlega allt öðruvísi en hún er í raun og veru. Mér finnst stundum eins og ég lifi í draumi. Það er mjög auðvelt að kynnast fólki í Dubai, allavega út frá minni reynslu og mér finnst vera fullt af tækifærum. Flugfreyjustarfið gefur ekki kost á sömu rútínu alla daga þar sem ég vinn bæði á daginn og á nóttunni. Enginn mánuður er eins svo ég er í raun aldrei í rútínu. En þá daga sem ég er í fríi reyni ég að sinna heilsunni vel. Ég er duglega að hreyfa mig og elska að fara á ströndina hvort sem það er til að æfa eða bara njóta og fara í sólbað. Ég er mikið með vinum og það er endalaust í boði til að gera. Það eru margir staðir í Dubai sem ég held upp á, en ég myndi segja að borginni væri skipt upp í nokkur svæði og mín uppáhalds eru Dubai Marina, Downtown, The Palm og Jumeirah.

Ég elska að fara á strönd sem heitir Kite, ég fer vanalega þangað til að taka góðan göngutúr, hlaupa eða bara eiga góðan dag. Svo er endalaust úrval af strandarklúbbum og alltaf er hægt að finna einhvern nýjan til að prófa. Til að nefna nokkra skemmtilega þá eru það Kyma, White beach, Be Beach og Twiggy. Þegar ég á frídag er í miklu uppáhaldi hjá mér að verja deginum á strandarklúbbi með góðum vinum.

Þegar kemur að því að velja veitingastað er úrvalið ótrúlega mikið og er oft erfitt að ákveða hvert á að fara. Það sem er svo skemmtilegt við suma veitingastaðina hér er stemmingin, staðirnir breytast iðulega í hálfgerða klúbba svo maður endar oft kvöldverðinn á því að dansa uppi á stól. Bagatelle, Ula, Nammos, Urla eru ótrúlega flottir staðir en ég gæti nefnt endalaust af veitingastöðum sem ég mæli með. Svo er auðvitað stærsti vatnsrennibrautagarður í heimi í Dubai. Ég hef prófað hann einu sinni og þarf svo sannarlega að fara aftur þar sem það er nánast ómögulegt að sjá allan garðinn á einum degi.“

Það er hægt að bralla ýmislegt skemmtilegt í Sameinuðu arabísku furstadæmunum. Ljósmynd/Aðsend

Valentína hugsar vel um sig og hefur fundið líkamsræktarstöð sem er í uppáhaldi.

„Ég fer mikið í ræktina og finnst gaman að prófa nýjar líkamsræktarstöðvar, en ég hef fundið eina sem heitir Wellfit og fer oftast þangað. Ég á góða íslenska vinkonu hér sem er einkaþjálfari í ótrúlega flottri og nýrri stöð hjá Wellfit. Þar sem það er svo margt í boði, þá hef ég fundið nokkrar síður t.d. á Instagram sem sýna hvað sé í boði í borginni. Þar hef ég fundið m.a. sunnudagsjóga sem er á Kite ströndinni. Svo hef ég séð hóp sem tekur pílates morgunæfingu og fer svo saman á kaffihús eftir. Þetta er til dæmis mjög góð leið til að kynnast fólki ef maður er að leitast eftir því.“

Hún segir lífið í Dubai vera frábært. Ljósmynd/Aðsend

Valentína býr í íbúð sem flugfélagið útvegaði henni.

„Veðrið er nánast alltaf fullkomið en helsti gallinn er hvað það verður heitt á sumrin. Frá júní til september er nánast ekki hægt að vera úti vegna hita þar sem hann getur farið upp í 45 gráður. Ég bý með tveimur öðrum stelpum í íbúð sem Emirates útvegaði okkur. Flugliðar hjá Emirates búa yfirleitt með einum eða tveimur öðrum. Ég er mjög heppin bæði með staðsetningu og stelpurnar sem ég bý með.

Dubai er auðvitað allt öðruvísi en Ísland og ég þurfti alveg að venjast því þar sem ég hafði aldrei áður flutt út fyrir landsteinanna. Það sem mér finnst erfiðast er að búa langt frá fjölskyldu og vinum. Annars elska ég lífið hérna og er að njóta þess til fulls.“

Hefurðu farið í skemmtileg stopp í vinnunni?

„Ég hef farið á fullt af áhugaverðum stöðum og til margra landa sem ég hefði mögulega ekki farið til ef ég væri ekki að vinna hjá Emirates. Mér finnst Víetnam vera mjög fallegt land og býður það upp á náttúru sem ég hafði aldrei séð áður. Ég flaug til Hanoi og við í áhöfninni fórum í siglingu í Halong Bay á bæði bát og skipi. Stoppið mitt til Cape Town stendur líka upp úr. Þá var ég með frábærri áhöfn og við skoðuðum alla borgina með fararstjóra, sem var algjör upplifun. Afríka er eiginlega í uppáhaldi hjá mér. Ég hef farið á nokkra áfangastaði þar og það sem ég kann mest að meta við Afríku er fólkið. Svo eru fullt af fleiri stöðum sem ég elskaði og væri alveg til í að fara aftur til eins og Balí, Máritíus, Miami og Grikkland.“

Valentína var mjög hrifin af Halong Bay í Víetnam. Ljósmynd/Aðsend

Hvað stendur upp úr?

„Einnig á ég fullt af góðum minningum úr flugunum. Mér finnst alltaf gaman þegar það eru lítil börn um borð. Í eitt skiptið var móðir að ferðast ein með lítið barn og það vildi svo óheppilega til að hún veiktist mikið um borð. Hún gat því ekki séð um barnið svo ég varð að pössunarpíu það sem eftir lifði flugs. Seinna sendi hún Emirates bréf þar sem hún var svo þakklát fyrir hvað við sáum vel um barnið hennar og hana sjálfa. Það kemur nefnilega oft í ljós að flugfreyjustarfið er ekki bara það að gefa mat og drykki heldur erum við þjálfuð fyrir allt sem getur komið fyrir um borð.“

Flugfreyjustarfið getur verið krefjandi en æðislega skemmtilegt. Hér er Valentína á Balí í vinnustoppi. Ljósmynd/Aðsend

Hvernig fílar þú að vinna sífellt með nýju samstarfsfólki?

„Oftast er það bara gaman. Ég fæ að kynnast ótrúlega ólíku fólki frá mismunandi stöðum úr heiminum. Sum flug eru þannig að áhöfnin nær mjög vel saman og það er eins og við höfum alltaf þekkst. Þá er virkilega gaman að gera eitthvað saman í stoppunum, við verðum eins og ein krúttleg fjölskylda, á meðan við erum í 1-3 sólarhrings stoppi á einhverjum framandi stað. Svo kemur auðvitað fyrir líka að ég vinni með fólki sem ég tengi ekki jafn mikið við en það er bara eins og í öðrum vinnum.

Ég get beðið um ákveðna áfangastaði fyrir hvern mánuð en það fer svo eftir ýmsu hvað ég fæ hverju sinni. Það er ekki hægt að biðja um flug með ákveðnum einstaklingum en ef mig langar að fá flug með vinum mínum, þá get ég reynt að skipta um flug. Ég er með marga staði á óskalistanum, t.d. Rio de Janeiro, Tokyo, Sansibar og að öllum líkindum á bara eftir að bætast á þennan lista.“

Dagarnir eru ólíkir en þessi mynd er tekin í Brisbane í Ástralíu. Ljósmynd/Aðsend

Hvað færðu mörg frí á ári?

„Frá því að ég flutti út hef ég farið þrisvar heim til Íslands þar sem við fáum ákveðið marga daga í frí á ári og hef ég alltaf nýtt þá til þess að fara heim. Ég fer heim aðallega til að hitta fólkið mitt þar sem ég sakna þeirra mest við Ísland.“