Mataræði franskra skólabarna til fyrirmyndar
Setja bókamerki
Tengdar fréttir
Næring barna
Frönsk börn standa að ýmsu leyti vel og betur en mörg önnur börn þegar kemur að matarmenningu. Þau glíma síður við vandamál tengd ofþyngd, offitu, sykursýki eða of háum blóðþrýstingi, öfugt við t.d. bandarísk börn. Þau borða almennt ferskan mat og nærast á ákveðnum tímum dagsins. Börnin stunda einnig daglega hreyfingu, en í skólanum fá þau til þess þrjár frímínútur yfir daginn. Einnig ganga þau eða hjóla til og frá skóla.
Matseðlar í skólanum eru ákveðnir tvo mánuði fram í tímann og eru skoðaðir af sérstökum næringarfræðingum. Þeir geta þá komið með einstakar athugasemdir. Til dæmis skipt út súkkulaðibúðingi fyrir kíví sem eftirrétt, ef sykurmagn máltíða er of mikið þá vikuna.
Staðbundið hráefni
Matseldin fer fram í eldhúsi skólans en lagt er upp úr ferskmeti í stað frosinnar/tilbúinnar vöru. Starfsfólkið vinnur þar hörðum höndum daglega við að útbúa aðalrétti, súpur, salöt og flesta eftirrétti. Hráefnin eru að mestu leyti staðbundin og stundum beint frá býli. Annan hvern dag er boðið upp á a.m.k. eitt lífrænt hráefni í máltíðinni og einu sinni í mánuði er máltíðin að öllu leyti lífræn. Með matnum drekka börnin hreinsað kranavatn.
Stjórnendum skólans er mjög í mun að matmálstími sé stund þar sem börnin setjast niður í rólegu umhverfi og borði heilnæma máltíð. Þannig eiga þau betur með að melta matinn og orkan endist þeim betur þegar líður á daginn.
Frönsk matarmenning er eflaust eitthvað sem íslenskir skólar og uppaldendur geta dregið lærdóm af og haft til fyrirmyndar við mataruppeldi sinna barna.
Tengdar fréttir
Næring barna
