Að undanförnu hefur talsvert borið á hinum ýmsu pestum í samfélaginu. Að gefnu tilefni birti ljósmóðirin Helga Reynisdóttir mikilvæg skilaboð á Instagram-reikningi sínum.
„RS-vírusinn, inflúensa og Covid eru í góðu svingi í þjóðfélaginu núna. Vissir þú að RS-vírusinn getur verið saklaust kvef hjá fullorðnum en getur lagst þungt á yngstu krílin. Ekki fara í heimsókn til nýrra foreldra nema að vera 150% í standi, sprittaðu þig og ekki kyssa barnið, nema þú eigir það,“ skrifaði Helga.
Í gær ræddi Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins, við blaðamann Morgunblaðsins um þær pestir sem herja nú á landsmenn. Hún segir mikið vera af kórónuveirunni í samfélaginu í bland við alls konar aðrar pestir.
Aðspurð segist Ragnheiður hafa mestar áhyggjur af RS-veirunni enda geti hún reynst ungum börnum hættuleg. Hún minnir fólk á að æskilegt sé að halda sér til hlés finni maður fyrir einkennum.