„Segðu að amma þín sé Edda „fokking“ Björgvins“

Edda Björgvinsdóttir er fjögurra barna móðir og margra barna amma og lumar að sjálfsögðu á ýmsum góðum ráðum, uppfullum af húmor, einlægni og gleði.

Hér deil­ir hún fimm af sín­um bestu ömmuráðum.

1. Elska þau í tætlur og finnast allar hugmyndir þeirra sérlega áhugaverðar.
2. Elska þau enn meira og dekra þau í drasl. 
3. Láta allt eftir þeim þegar þau eru í heimsókn (svo fremi að þau séu ekki beinlínis í hættu) og muna að foreldrarnir sjá um uppeldið - ömmur skemmta. 
4. Vitna linnulaust í langömmur og langalangömmur og rifja upp heilræði þeirra sbr. „Ekki fikta í naflanum þínum því þá detta af þér rasskinnarnar!“
5. Hafa bullandi húmor fyrir þeim og grínast stanslaust (ég segi reglulega ef þau kvarta yfir stríðni eða leiðindum í skólanum: „Segðu að amma þín sé Edda „fokking“ Björgvins og ef þau abbast uppá þig þá kem ég og skalla þau!“)