Tökur á áttundu kvikmyndinni í The Fast and The Furious bálkinum, Fast 8, eru nú hafnar að nýju á eyju víðsfarri Íslandi. Tökur á myndinni stóðu yfir á Mývatni og Akranesi síðustu vikur en tökuliðið hefur nú fært sig á hlýrri slóðir, nefnilega til Kúbu.

Fast 8 varð þannig formlega fyrsta bandaríska kvikmyndin til þess að vera tekin upp í Kúbu frá því að Bandaríkin komu á viðskiptabanni í eyríki Fidel Castro á sjöunda áratugnum.

Samkvæmt Havana Times hafa Kúbverjar flykkst að tökustöðum til þess að berja bílana og leikarana augum og hvorki aukin umferð né sá möguleiki að þeir endi óvart sem statistar í myndinni virðast trufla innfædda.

Fast 8 verður fyrsta myndin í þríleik sem ætlað er að loka bálkinum. Áætlað er að tíunda og síðasta kvikmyndin komi út á tuttugu ára afmæli hans, árið 2021.