Óskarsverðlaunahafinn Michelle Yeoh og unnusti hennar, fyrrverandi framkvæmdastjóri Ferrari, Jean Todt, gengu í hjónaband í gær, fimmtudaginn 27. júlí. Hjónin giftu sig í svissnesku borginni Genf 19 árum eftir að þau trúlofuðu sig.
Yeoh kynntist Todt árið 2004 í borginni Sjanghaí þegar hún var ráðin til þess að leika í auglýsingu fyrir bílarisann Ferrari, en hjónin trúlofuðu sig í júlí það sama ár eftir aðeins sex vikna kynni.
Meðal gesta í brúðkaupinu var Formúlu 1 ökumaðurinn Felipe Massa, en hann brá sér um stund í hlutverk brúðkaupsljósmyndara og birti fallega myndaseríu af deginum á Instagram-reikningi sínum. Myndirnar sýna leikkonuna meðal annars með Óskarsverðlaunastyttuna sem hún hlaut fyrr á þessu ári fyrir kvikmyndina Everything Everywhere All at Once.