Nú er leikárinu að ljúka, hvert svo sem leikhúsið er. Starfsfólkið fer þá í kærkomið frí eftir annasamt leikár og þar eru engir undanskildir, já, ekki einu sinni þau sem vinna í miðasölunni.
Sú, sem þetta skrifar, vann í ellefu ár í miðasölu Borgarleikhússins og hripaði þá hjá sér nokkur skondin tilvik sem sneru að samskiptum við kúnnana.
„Áttu miða á Mamma Mia? Ég vil að sætin séu inni í salnum.“
*
„Áttu einhverja miða á Ellý Ármanns?“
„Nei, en ég get mögulega athugað fyrir þig með lausa miða á sýninguna um Elly Vilhjálms.“
*
„Ég ætla að panta miða á Hard Rock Café.“
„Ertu að meina Rocky Horror Picture Show?“
*
„Ég á gjafabréf í Borgarleikhúsið og einnig gjafabréf upp á veitingar. Ég má velja á milli þess að fá brauðsnittur eða Tópas.“
„Við bjóðum upp á Tapas, er það ekki málið?“
*
„Ég ætla að fá miða á Kerlingu með Ljótu hálfvitunum.“
„Ertu að meina Kvenfólk með Hundi í óskilum?“
Ef þú lumar á skemmtilegum gullkornum frá fjölskyldumeðlimum, góðvinum, vinnu- og eða drykkjufélögum þá hvet ég þig óspart til að senda tölvupóst á gullkorn@mbl.is.
Það er aldrei að vita nema gullkornið þitt birtist á síðum mbl.is.