Breski tónlistarmaðurinn Colin Gibb er látinn, 70 ára að aldri.
Gibb var hvað þekktastur sem meðlimur hljómsveitarinnar Black Lace. Sveitin vakti fyrst athygli árið 1979 með þátttöku sinni í Söngvakeppni evrópskra sjónvarpsstöðva en hún náði heimsfrægð örfáum árum síðar með útgáfu lagsins Agadoo.
Gibb, sem tilkynnti nýverið að hann væri sestur í helgan stein, varð bráðkvaddur á heimili sínu í fyrradag.
Eiginkona Gibb, Sue Kelly, greindi frá andláti tónlistarmannsins á Facebook-síðu sinni í gær og sagðist miður sín yfir andláti elskulegs eiginmanns síns. Hjónin voru á leið til Spánar nú á fimmtudag þar sem þau ætluðu sér að eyða gullárum sínum í sólinni.