Bresk kona sem segist hafa verið innblásturinn að eltihrellinum í sjónvarpsþáttaröðinni vinsælu Baby Reindeer á Netflix hefur höfðað mál gegn streymisveitunni. Hún krefst 170 milljóna dollara í bætur, eða tæplega 24 milljarða króna.
Fiona Harvey segist vera hin raunverulega Martha, sem er ofbeldisfull og haldin miklum ranghugmyndum í þáttunum, sem Richard Gadd bjó til. Í upphafsþættinum segir hann að um sanna sögu sé að ræða.
„Ofangreind tilvitnun…er mesta lygi sjónvarpssögunnar,” sagði í málshöfðuninni, sem var lögð fram í bandaríska ríkinu Kaliforníu.
„Þetta er lygi sem Netflix sagði og höfundur þáttanna, Richard Gadd, vegna græðgi og þrár um frægð; lygi sem var hönnuð til að laða að fleiri áhorfendur, fá meiri athygli, græða meiri peninga og eyðileggja grimmilega líf þess sem höfðar málið, Fiona Harvey,” sagði þar einnig.
Í yfirlýsingu til AFP-fréttastofunnar sagði talsmaður Netflix: „Við ætlum að verjast þessu máli af fullum krafti og stöndum með rétti Richards Gadd til að segja þessa sögu.”
Þættirnir eru sjö talsins og voru þeir frumsýndir á Netflix í apríl. Þeir urðu fljótt afar vinsælir. Þeir byggja á einleik Gadds og fjalla um höfund sem hittir konu á krá þar sem hann starfar.