Diddy sviptur heiðursgráðu sinni

Stjórn Howard-háskóla hefur ákveðið að svipta tónlistarmanninn Sean „Diddy“ Combs heiðursgráðu sinni. Ákvörðunin kemur í kjölfar myndskeiðs sem CNN fréttastofan birti þar sem Diddy gengur í skrokk á fyrrverandi kærustu sinni Cassie Ventura. 

Skólinn er einn virtasti háskóli Bandaríkjanna og er sögufrægur skóli innan svartrar menningar í Bandaríkjunum, en flestir nemendur skólans eru dökkir á hörund. 

„Hegðun eins og sást í myndskeiðinu fer svo gegn grundvallargildum Howard að hann [Diddy] er ekki talinn verðugur þess að halda æðsta heiðri stofnunarinnar, segir í yfirlýsingu skólans vegna málsins. 

Myndskeið: Diddy gekk í skrokk á Ventura (mbl.is)

Hefur setið undir þungum ásökunum

Diddy baðst afsökunar á gjörðum sínum í myndskeiði sem hann birti á Instagram reikningi sínum.

Hann hefur setið undir þungum ásökunum síðustu misseri. Hann hefur verið kærður átta sinnum á sex mánuðum fyrir líkamsárásir, kynferðisofbeldi og mansal.

Í mars var gerð vopnuð húsleit á nokkrum heimilum í eigu tónlistarmannsins í tengslum við rannsókn lögreglu á mansals og kynferðisbrotamáli.

Vopnuð húsleit á heimilum Diddy (mbl.is)

Frétt af mbl.is

Áttunda kæran á sex mánuðum

• Blogga um frétt