William Anders, fyrrverandi geimfari, lést í flugslysi í gær 90 ára að aldri. Anders var einn um borð í vélinni er hún hrapað undan strönd Washington–ríkis í gærmorgun.
Lík Anders er enn ófundið og stendur yfir umfangsmikil leit á svæðinu.
Anders var hluti að Apollo 8–leiðangrinum árið 1968, fyrstu geimferð manna í kringum tunglið. Hann tók hina sögulegu mynd af jörðinni frá tunglinu, sem er gjarnan nefnd „earthrise“ á ensku.
Anders fæddist í Hong Kong árið 1933. Hann útskrifaðist úr bandaríska sjóhersskólanum og lauk síðar meistaragráðu í kjarnorkuverkfræði.
Þegar Anders lauk störfum sínum sem geimfari sinnti hann ýmsum störfum innan bandarísku stjórnsýslunar. Hann var meðal annars fyrsti formaður kjarnorkueftirlitsnefndar Bandaríkjanna og síðar var hann sendiherra Bandaríkjanna í Noregi.