Heppinn að vera á lífi eftir alvarlegt hjólaslys

Íslandsvinurinn og stjörnukokkurinn Gordon Ramsay segist vera heppinn að vera á lífi eftir að hann lenti í alvarlegu hjólreiðaslysi í Connecticut í Bandaríkjunum á dögunum. 

Ramsay sagði frá slysinu í myndbandi sem birtist á samfélagsmiðlum hans, en þar lagði hann áherslu á að senda skýr skilaboð til allra um að nota alltaf hjálm. 

„Mig langar að deila mjög mikilvægum skilaboðum með ykkur öllum. Þið vitið hversu mikið ég elska hjólreiðar, þríþraut, járnkarl o.s.frv. Í vikunni lenti ég því miður í mjög slæmu slysi sem var mikið áfall. Og satt að segja er ég heppinn að vera hér,“ segir Ramsay í myndskeiðinu, en hann þurfti að leggjast inn á sjúkrahús í kjölfar slyssins. 

Kokkurinn þakkar læknum og hjúkrunarfræðingum sjúkrahússins fyrir að annast hann en sagðist vera þakklátastur fyrir hjálminn sem hafi bjargað lífi hans. „Þar sem feðradagurinn er á morgun er ég með mjög mikilvæg skilaboð til allra pabba þarna úti ... NOTIÐ HJÁLM!“ skrifaði Ramsay.

Í myndskeiðinu sýnir Ramsay slæmt mar sem hann hlaut í slysinu, en hann er illa marinn eftir allri síðunni.

• Blogga um frétt