Breski leikarinn Ian McKellen, sem lék Gandalf í Lord of the Rings-myndunum, er á batavegi eftir að hafa fallið af leiksviði í Lundúnum í gærkvöldi.
„Eftir að hafa farið í rannsókn hefur hið frábæra starfsfólk bresku heilsugæslunnar fullvissað okkur um að hann muni ná sér fljótt og örugglega og Ian er í góðum gír,” sagði talsmaður leikhússins Noel Coward.
„Ákveðið hefur verið að fresta sýningunni þriðjudaginn 18. júní svo að Ian geti hvílt sig.”
Búist er við því að leikarinn, sem er 85 ára, snúi aftur á sviðið á morgun en þar fer hann með hlutverk í leikritinu Player Kings.