Myndir: Líf og fjör á tökustað Eldanna
Setja bókamerki
„Ég las bókina fyrir fjórum árum og nú er þetta loks að verða að veruleika,“ segir Grímar Jónsson kvikmyndaframleiðandi. Tökur á kvikmyndinni Eldunum, sem gerðir eru eftir samnefndri bók Sigríðar Hagalín Björnsdóttur, hófust í síðustu viku.
„Við byrjuðum við Reykjanesvita á þriðjudaginn í 20-25 metrum á sekúndu. Það var erfið byrjun en að mörgu leyti var gott að byrja í erfiðum aðstæðum,“ segir Grímar en daginn eftir voru tökur með Landhelgisgæslunni þar sem ímyndað sprengigos við Eldey var myndað.
„Þá fórum við úr stormi niður í logn,“ segir Grímar. Í lok síðustu viku var svo myndað við Kleifarvatn þar sem meðal annars voru tökur með vísindamönnum við rannsóknir. Við það tækifæri kom Sigríður Hagalín einmitt í heimsókn og fékk að fylgjast með tökum. Vel fór á með henni og tökuliðinu eins og sjá má á meðfylgjandi mynd.
Leikstjóri myndarinnar er Ugla Hauksdóttir en með aðalhlutverk fara Vigdís Hrefna Pálsdóttir, Pilou Asbæk og Jóhann G. Jóhannsson. Grímar segir að tökudagar verði alls 28 talsins og stefnt sé að því að tökum ljúki í lok október. Myndin verður svo frumsýnd á haustmánuðum 2025.
Vinsæl saga
Skáldsagan Eldarnir – Ástin og aðrar hamfarir, eftir Sigríði Hagalín Björnsdóttur, kom út árið 2020. Í bókinni segir frá því þegar jarðskjálftar skekja Reykjanesskaga og eldfjöll vakna til lífsins eftir hlé í 800 ár. Bókin seldist vel þegar hún kom út og enn betur eftir að jarðhræringar hófust svo á Reykjanesskaga stuttu síðar.
Fréttin birtist í Morgunblaðinu 16. september.
Grænlendingar vildu ekki fá björninn til baka
Glæpastarfsemi orðin mun skipulagðari
Mikill viðbúnaður við Sæbraut
Davíð Viðarsson var skyndihugdetta
Vangaveltur gengu lengra en innistæða var fyrir
Fjöldi í varðhaldi – mikið haldlagt á árinu
Gerðu umfangsmiklar loftárásir á Líbanon