Bandarískur leikari að nafni Jack Merrill ræddi við tímaritið People nú á dögunum og rifjaði upp árás sem hann varð fyrir af hálfu raðmorðingjans John Wayne Gacy árið 1978.

Er þetta í fyrsta sinn sem Merrill tjáir sig opinberlega um árásina sem gerðist aðeins sjö mánuðum áður en Gacy var ákærður fyrir að hafa myrt að minnsta kosti 33 unga karlmenn á árunum 1972 til 1978.

„Þegar ég rankaði við mér var ég í handjárnum“

Merill, sem þá var 19 ára gamall og búsettur í Chicago, var að ganga heim til sín að kvöldi til þegar Gacy nálgaðist hann og bauð honum far. Merill þáði boðið en fór fljótt að gruna að ekki væri allt með felldu þegar Gacy spurði hann hvort hann hefði einhvern tímann prófað partílyf sem kallast á götunni „poppers.”

„Hann dró fram brúna flösku, skvetti vökva í tusku og þröngvaði henni í andlitið á mér,” sagði Merill í samtali við blaðamann People.

„Ég datt út og þegar ég rankaði við mér var ég í handjárnum og kominn fyrir utan húsið hans,” útskýrði Merill sem sagði Gacy hafa troðið byssu upp í munninn á sér og í framhaldi nauðgað sér. Örfáum klukkustundum síðar bauðst Gacy til að keyra Merrill heim, en því miður fengu ekki allir sem hann kom nærri slíkt boð.

Líf raðmorðingja vekur áhuga

Merill, sem er í dag 65 ára, sagði að erfitt væri að fylgjast með fólki taka ástfóstri við sögum raðmorðingja og hámhorfa á þáttaraðir um raunverulegt fólk sem hefði orðið fyrir barðinu á illa innrættu fólki líkt og Gacy og Jeffrey Dahmer.

Þó nokkrar kvikmyndir og þáttaraðir hafa verið gerðar um Gacy í gegnum árin og þykir mörgum líklegt að sjónvarpsþáttaröðin Monster muni gefa innsýn í líf hins truflaða morðingja fyrr en síðar.

Tengdar fréttir

Poppkúltúr

Alsystir Prince látin 64 ára

• Jason Kelce og Taylor Swift láta eins og ekkert sé eftir ljótt atvik
• Þurfti að bæta við sætum vegna mikillar aðsóknar
• Sigraði hrekkjuvöku sem Halla Tómasdóttir
• Gagnrýnd fyrir að bera krossinn á milli brjóstanna

» Fleiri tengdar fréttir

• Blogga um frétt