Veröld/Fólk | mbl | 1.11.2024 | 10:33 | Uppfært 11:07

Maðurinn sem setti samfélagsmiðla á hliðina kominn í framboð

Ívar Orri setti samfélagsmiðla heldur betur á hliðina þegar hann byrjaði að deila myndskeiðum af sér að borða óeldaðan mat. Samsett mynd

Ívar Orri Ómarsson, maðurinn sem vakti athygli landsmanna fyrr á árinu vegna sérkennilegrar mataráskorunar sem fólst í því að borða einungis óeldaðan mat í fjórar vikur, hefur ákveðið að gefa kost á sér í 2. sæti á lista Lýðræðisflokksins í Reykjavíkurkjördæmi suður fyrir komandi þingkosningar.

Þann 14. febrúar síðastliðinn birtist viðtal á mbl.is við Ívar Orra þar sem hann ræddi meðal annars um mataráskorunina og útskýrði hvað lá að baki henni.

„Meginástæðan fyrir því að ég ákvað að taka þessari áskorun er sú að fyrir fimm árum þá greindist ég með sykursýki I. Ég hef verið á fullu að lesa mig til og prófa hina ýmsu hluti, eins og mismunandi mataræði, í leit að lækningu,“ sagði Ívar sem var þrítugur þegar hann greindist eftir að hafa upplifað mikla vanlíðan.

Ívar ákvað að nýta sér áskorunina til að auka lífsgæði sín. „Áskorunin felst í því að borða ekkert nema óeldaðan mat í heilan mánuð til að sjá hvort það hafi einhver veigamikil áhrif á mig. Ég fylgist grannt með blóðsykrinum og mæli hann reglulega yfir daginn ásamt því að skoða insúlínþörf mína á hráfæðismataræðinu. Ég ber mælingarnar síðan saman við þær sem ég hef fengið úr „hefðbundna“ daglega mataræðinu,“ sagði Ívar sem skoðaði einnig andlega og líkamlega líðan, meltingu, svefngæði og fleira.

Frétt af mbl.is

Ívar greindist með sykursýki og borðar hráan mat í heilan mánuð

„Það er kominn tími á róttækar breytingar“

Ívar Orri tilkynnti um framboð sitt á samfélagsmiðlasíðunni Instagram nú á dögunum og viðurkenndi meðal annars að hafa óbeit á stjórnmálum og engan áhuga á að sitja á Alþingi.

„Það er kominn tími á róttækar breytingar. En hlutirnir gerast ekki af sjálfu sér. Ef maður vill breytingar þá þarf maður sjálfur að taka í taumana og axla ábyrgð á eigin lífi. Að því sögðu hef ég ákveðið að ég ætla að gera meira en bara kvarta á samskiptamiðlum. Þeir sem þekkja mig vita að ég hef óbeit á stjórnmálum og hef engan áhuga á því að sitja á Alþingi. En í ljósi alvarleika aðstæðna þá sé ég engan annan kost en að bretta upp ermar og leggja mitt af mörkum fyrir samfélagið mitt sem ég elska svo heitt,“ skrifaði hann meðal annars við færsluna.