Veröld/Fólk | mbl | 19.11.2024 | 13:30

Dyrnar opnaðar inn í myrkt samband Sonny og Cher

Sonny og Cher eiga eitt þekktasta lag allra tíma, I Got You Babe. Pinterest

Söngkonan Cher var svo full örvæntingar yfir „ástlausu hjónabandi“ hennar og Sonny Bono að hún íhugaði að henda sér fram af svölum hótelsvítunnar þeirra í Las Vegas. Þetta kemur fram í nýrri endurminningabók hennar.

Í bókinni er gefin mynd af Cher, þá 25 ára, þegar hún hafði hrapað niður í tæp 45 kíló sökum álags.

Ákveðinn vendipunktur varð í október 1972 þegar parið – sem er hvað þekktast fyrir lagið I Got You Babe – var í Las Vegas og hélt tvenna tónleika kvöld eftir kvöld á Congo Room á Sahara-hótelinu.

Cher var gjörsamlega uppgefin þegar Sonny tilkynnti henni að hann hefði skrifað undir samning fyrir hönd þeirra beggja um að koma fram á Caesars Palace í Vegas á hverju sumri í ótiltekinn fjölda ára. Á sama tíma og þau unnu vinsæla gamanþætti fyrir CBS og ólu upp barnið sitt, Chas.

Sonny og Cher kynntust þegar hún var aðeins 16 ára og hann þá 27 ára. Pinterest

„Ég vil sofa hjá Bill“

Cher minnist þess að hafa stigið berfætt út á svalir hótelsvítunnar og starað niður. Á meðan hún stóð þar flaug í gegnum hugann hve auðvelt væri að stíga yfir brúnina og láta sig hverfa.

Þetta segist hún hafa gert nokkrum sinnum áður en hún hugsaði í síðasta skiptið að hún þyrfti ekki að stökkva heldur aðeins að yfirgefa Sonny, manninn sem hún kynntist þegar hún var 16 ára og hann 27 ára.

Hún steig aftur inn í hótelherbergið og sagði: „Ég vil sofa hjá Bill,“ og átti þar við gítarleikarann í hljómsveitinni. Hún segist ekki hafa meint þetta en að Sonny, sem var svo stjórnsamur, hafi ekki hlustað á fyrri beiðnir hennar um að slíta sambandinu.

Þögnin var þrúgandi en hann hafi svo spurt hvað hún þyrfti langan tíma. Hún svaraði honum að hún þyrfti tvær klukkustundir en endaði á að gráta við öxl Bills alla nóttina.

Daginn eftir bað hún Sonny um 500 dollara til að yfirgefa hann og komst þá að því að hann hafði sofið hjá kærustu Bills í hefndarskyni. Cher og Bill flugu til San Francisco með einkaspæjara á vegum Sonny á hælunum.

Cher segir þau hafa bókað hótelherbergi og stundað „ótrúlegt kynlíf“. Upp frá því vissi Cher að hún myndi aldrei stunda kynlíf með Sonny aftur.