Írönsk poppstjarna dæmd til dauða

Dómstóll í Íran hefur dæmt tónlistarmanninn Amir Hossein Maghsoudloo, betur þekktur undir listamannsnafninu Tataloo, til dauða fyrir guðlast.

Söngvarinn, sem er 37 ára og þekkt poppstjarna og rappari í heimalandi sínu og víðar um heim, hefur verið í haldi lögreglu frá því í desember 2023, eða frá því að hann var framseldur frá Tyrklandi, en hann hafði verið búsettur í Istanbúl frá árinu 2018.

Fjölmiðlar í Íran, meðal annars Etemad og Jame Jam, greindu frá því á sunnudag að Tataloo hefði verið dæmdur til dauða af hæstarétti Íran eftir að hafa verið fundinn sekur um að móðga Múhameð spámann.

Tataloo hefur reglulega komist í kast við lögin í gegnum árin og þá sérstaklega vegna skoðana hans, sem aðhyllast ekki hugmyndafræði íslams. Hann hefur ítrekað hafnað ákærum á hendur sér og fullyrt rétt sinn til frjálsrar listrænnar tjáningar. 

Tataloo hyggst áfrýja dómnum.

• Blogga um frétt