Lamaðist í helmingi andlitsins vegna streitu

Raunveruleikaþáttastjarnan og talskonan, Bristol Palin, vaknaði upp við vondan draum fyrir níu dögum þegar hún hafði lamast í helming andlitsins. Palin deildi reynslunni með fylgjendum sínum á Instagram.

Palin er elsta dóttir viðskiptajöfursins Todd Palin og stjórnmálakonunnar og fyrrum ríkisstjóra Alaska, Söru Palin. Það má segja að Palin hafi fyrst komist í sviðsljósið þegar móðir hennar tilkynnti um óléttu hennar á meðan á fyrstu kosningabaráttu hennar til faraforsetaefnis Bandaríkjanna stóð, árið 2008. Þá var Palin 17 ára.

Síðan þá hefur Palin verið ötull talsmaður þess að unglingar haldi sig frá kynlífi til að koma í veg fyrir ótímabæra þungun en móðir hennar hefur jafnframt verið mikill talsmaður gegn þungunarrofum. 

„Ég vaknaði fyrir níu dögum með smá skrýtna tilfinningu í andlitinu,“ segir Palin í Instagram-sögu sinni og sýnir hvernig helmingur munnsins teygist í aðra átt.

„Innan örfárra klukkutíma var öll vinstri hlið andlitsins dofin og bara lömuð.“

Palin fór í sneiðmyndatöku og var útskrifuð með stera, ásamt annars konar lyfjum. Hún segir lítið hafa gengið til baka en að læknarnir telji að lömunin stafi af streitu eða svefnleysi. Í slíkum tilfellum er um að ræða einhvers konar truflun á taugum sem veldur, samkvæmt National Institute of Neurological Disorders, lömun eða máttleysi í annarri hlið andlitsins. 

Palin er á hægum batavegi og segist aldrei aftur munu agnúast út í útlit sitt, nú þegar hún hefur upplifað að geta ekki hreyft helming andlitsins.

Page Six