Ekki tilkynnt um meiðsli í árekstrinum
Setja bókamerki
Lögregluyfirvöld í Ástralíu segja að engin meiðsli hafi verið tilkynnt í bílslysi sem talið er að Virginia Guiffre, sem var eitt meintra fórnarlamba auðjöfursins Jeffreys Epsteins, hafi lent í.
Guiffre deildi færslu á sunnudaginn þar sem hún kvaðst eiga fjóra daga eftir ólifaða sökum nýrnabilunar eftir að hún lenti í bílslysi.
Breska dagblaðið Telegraph greinir frá.
„Minniháttar árekstur“
Lögreglan í Vestur-Ástralíu, þar sem Guiffre býr, staðfesti við The Telegraph að „minniháttar árekstur“ hefði átt sér stað milli rútu og bíls í sveitabyggðinni Neergabby, sem er staðsett um 19 kílómetra norður af Perth, þann 24. mars rétt eftir klukkan 15:00 að staðartíma.
„Engin tilkynnt meiðsl urðu vegna árekstursins,“ sagði talsmaður lögreglu Vestur-Ástralíu í yfirlýsingu.
Áreksturinn var tilkynntur af bílstjóra rútunnar daginn eftir og bíllinn varð fyrir minniháttar skemmdum, að sögn lögreglu. Það hefur ekki verið staðfest opinberlega að þetta sé áreksturinn sem Guiffre fullyrðir að hún hafi lent í.
„Þeir hafa gefið mér fjóra daga“
Í færslunni segist Guiffre þjást af nýrnabilun í kjölfar slyssins og óskar eftir að sjá börnin sín í „síðasta sinn“ áður en hún deyr.
„Þeir hafa gefið mér fjóra daga og flutt mig á sjúkrahús sem sérhæfir sig í þvagfæralækningum,“ segir hún við myndina.
„En ég held það sé mikilvægt að hafa í huga þegar skólabíll kemur að þér á 110 km/klst þegar við vorum að hægja á okkur í beygju þá skiptir engu máli úr hverju bíllinn er gerður, það gæti allt eins verið áldós.“
Þunglynd og vill sameinast börnum sínum
Sky Roberts, faðir Giuffre, sagði við The Telegraph í gær að dóttir hans væri þunglynd og vildi sameinast börnum sínum á ný.
„Henni líður ekki vel. Hún er þunglynd því hún saknar barnanna sinna. Hún á fjóra daga eftir nema hún fái annað álit frá öðrum lækni,” sagði hann og hélt áfram:
„Það gæti verið að hún láti lífið eftir fjóra daga, eins og hún sagði. En ef hún fær annan lækni, gætu þeir líklega gert aðra hluti fyrir hana. Svo það er það eina sem ég bíð eftir að heyra.“
Reynir að vera sterkur fyrir dóttur sína
Roberts sagðist vera að reyna að „halda sér sterkum“ fyrir dóttur sína, en síðasta þekkta heimilisfang hennar var hjá eiginmanni hennar, sem hún er nú skilin við, í Vestur-Ástralíu.
Giuffre skildi nýlega við Robert Giuffre, eiginmann sinn til 22 ára. Talið er að hún hafi búið í litlum bæ norður af Perth síðan 2020.
Talsmaður Giuffre sagði á mánudaginn: „Virginia hefur lent í alvarlegu slysi og er að fá læknishjálp á sjúkrahúsi. Hún er mjög þakklát fyrir stuðninginn og góðar óskir sem fólk er að senda.“
Segir að verið sé að eitra fyrir börnum sínum með lygum
Fyrir viku síðan birti Giuffre færslu á netinu um hversu mikið hún saknaði barnanna sinna, en af færslunni að dæma má gera ráð fyrir því að hún sé ekki með forræði yfir börnunum sínum.
„Mín fallegu börn hafa enga hugmynd um hversu mikið ég elska þau og það er verið að eitra fyrir þeim með lygum,“ skrifaði hún.
„Ég sakna þeirra svo mikið. Ég hef gengið í gegnum helvíti og aftur á mínu 41 ári en þetta er að skaða mig ótrúlega mikið, meira en nokkuð annað.“
Vilja halda partý: „Farið að minna á Tsérnóbyl“
Biður um svigrúm til að fara yfir málin
Karlmaður látinn eftir umferðarslys
Flæðir enn í kvikuganginn úr Svartsengi
Miklu stærri og lengri kvikugangur
Ríkisstjórnin sökuð um brot á lögum
Sprungur gleikkuðu í Grindavík
„Meira eða minna búið, þetta gos“