Góð list er heiðarleg

„Ég fór í tveggja ára nám í hljóð- og mynd­list með áherslu á kvik­mynda­hand­rit. Eft­ir það hugsaði ég með mér að sem hand­rita­höf­und­ur, til dæm­is í sjón­varpi, yrði ég of háður öðrum og yrði ekki full­kom­lega frjáls í hug­mynda­vinnu. Ég fór að gera víd­eó og taka mynd­ir og leitaðist við að skapa mér sér­stöðu. Í mín­um huga er góð list heiðarleg. Besta leiðin til að vera heiðarleg­ur er að tala um og vinna með hluti sem maður þekk­ir vel. Þess vegna fór ég að vinna með ým­is­legt sem teng­ist starfi á skrif­stof­um, eins og rit­vél­ar, ljós­rit­un­ar­papp­ír, merkipenna, reglu­stik­ur og fleira.“

Þannig hófst vinna hans sem listamaður fyr­ir tutt­ugu árum en verk­in hafa þró­ast á þeim tíma. „Verk mín eru enn í þess­um anda en þau eru orðin flókn­ari, frjáls­ari og margræðari. Á þess­ari sýn­ingu eru til dæm­is teikn­ing­ar þar sem ég hef teiknað nán­ast ósjálfrátt með end­ur­tekn­um handa­hreyf­ing­um. Ég hef komið mér upp ákveðinni teikni­tækni og dæmi um hana eru á þess­ari sýn­ingu.

Áður vann ég aðallega með svart og hvítt, svart blek og hvít­an papp­ír eða notaði þá fjóra liti sem oft­ast sjást í skrif­stof­um: blátt, grænt, svart, rautt. Hér er ný og hlýrri litap­all­etta, brúnn, dökkrauður og dökk­blár, sem ég bý til með því að blanda sam­an lit úr merkitússi og bleki úr skrif­stofupenna.“

Meðal verka á sýn­ing­unni eru vél­ritaðar teikn­ing­ar. „Ég á breiða rit­vél en vanda­málið er að mörg drög að verk­um koma ekki vel út. Ef allt geng­ur vel get ég gert eina mynd á tveim­ur dög­um en oft geri ég marg­ar og kannski er ein­ung­is ein í lagi. Ég vil að slög­in skapi dýpt og takt í mynd­un­um og oft þarf ansi marg­ar til­raun­ir til að það tak­ist.“

Eitt verk, Circle Shift, er gert úr reglu­stik­um. „Ég á ung börn sem ég leik oft við og við byggj­um og mæl­um. Hug­mynd­in spratt upp úr slík­um leikj­um. Ég hugsaði: Það væri gam­an að skapa verk með því að klippa reglu­stik­ur og snúa þeim. Þetta er ein­falt verk sem virðist flókið og snýst um rýmið og mæl­ingu á tím­an­um.

Í verk­um mín­um er ég að brjóta upp lín­ur, sam­eina lín­ur og hringi og mynda lykkj­ur. Dæmi um það er ein­mitt þetta verk, Circle Shift, og svo verkið Stripe Circle þar sem er of­gnótt af tákn­um og mynd­um. Svo má nefna verkið Four Loops þar sem lykkj­ur fara und­ir brú og lit­ur þeirra breyt­ist. Þetta eru verk sem þarf að vinna kerf­is­bundið og af ná­kvæmni til að þau verði marglaga.“