Veröld/Fólk | Morgunblaðið | 2.5.2025 | 9:33

Heiðruðu Hammond-orgelið á Djúpavogi

Páll Óskar lokaði Hammondhátíðinni með tónleikum í Djúpavogskirkju, en Ómar Guðjónsson gítarleikari sést í bakgrunni. Ljósmynd/Jón Einar Ágústsson

Mikið var um dýrðir á Djúpavogi um síðustu helgi, en þá fór fram hin árlega Hammondhátíð bæjarins í 17. sinn. Hátíðin hefst alltaf á sumardaginn fyrsta og stendur fram á næsta sunnudag, en mjög fjölbreytt tónlistaratriði voru nú sem endranær á hátíðinni.

Líkt og nafn hátíðarinnar gefur til kynna er hún haldin til heiðurs hinu sögufræga Hammond-orgeli, sem kom fyrst fram á sjónarsviðið árið 1935, og var þá hugsað sem ódýrari valkostur við pípuorgel eða píanó.

Orgelið varð snemma mjög vinsælt meðal djasstónlistarmanna, en það var einnig mjög áberandi á 7. og 8. áratugnum þegar blús- og rokkhljómsveitir tóku það upp á arma sína.

Hátíðin var sett á Hótel Framtíð á sumardaginn fyrsta og var það hin unga og efnilega heimakona Ríkey sem steig þar fyrst á svið, en á eftir henni fylgdu þær Rakel, Salóme Katrín og Nanna.

Heimakonan Ríkey hóf Hammondhátíðina með miklum glæsibrag. Ljósmynd/Jón Einar Ágústsson

Hljómsveitirnar Sú Ellen og FM Belfast héldu uppi fjörinu á föstudagskvöldinu, en Jónas Sig og Ritvélar framtíðarinnar tóku slaginn á laugardaginn. Stóðu tónleikar þeirra yfir í tæpa þrjá klukkutíma og var gerður góður rómur að. Sólstrandargæjarnir komu svo aftur saman og ráku smiðshöggið á skemmtun laugardagskvöldsins.

Austfirska hljómsveitin margreynda Sú Ellen hélt uppi fjörinu á föstudagskvöldinu. Ljósmynd/Jón Einar Ágústsson

Hefð er fyrir því að Hammondhátíðinni ljúki með með tónleikum í Djúpavogskirkju, og að þessu sinni var það Páll Óskar sem flutti flestar af perlum sínum af ferlinum með þá Ómar Guðjónsson og Tómas Jónsson sér til aðstoðar. „Þetta var svo sannarlega töfrastund og ég naut hverrar einustu mínútu,“ segir Páll Óskar í samtali við Morgunblaðið um tónleikana í kirkjunni.

Hann segir að Hammond-orgelinu fylgi ákveðið flæði og tilfinning sem hljóðgervlar nái ekki, og líkir hann því við að hlusta á vínilplötur frekar en geisladiska.

Páll Óskar er nú að jafna sig eftir að hafa kjálkabrotnað í janúar og segir hann það vera sterka andlega upplifun að stíga á svið og finna að það sé allt í lagi að syngja.

Aðspurður hvort Hammond-orgelið hafi mögulega hjálpað til við batann, segir Páll Óskar kíminn í röddinni að það kunni vel að vera, en í raun hafi allir þeir tónleikar sem hann hafi tekið þátt í á síðustu vikum gert honum gott.

Segir hann það vera einhverja bestu endurhæfingu sem völ er á að stíga á svið og syngja og að hann hafi fengið undraskjótan bata.

Að taka upp nýja plötu

Þegar Morgunblaðið náði tali af Páli Óskari var hann í upptökuverinu að taka upp nýja plötu. Er þar um að ræða ávöxt samstarfs hans með Benna Hemm Hemm, en þeir voru fengnir til þess að semja saman lagið Allt í lagi fyrir þáttinn Hljómskálann á RÚV í janúar sl.

„Við áttum bara að semja saman þetta eina lag, en fyrr en varði vorum við komnir með fjögur lög, og nú erum við að fara að gefa út tólf laga plötu í haust,“ segir Páll Óskar.