„Mette-Marit óskaði eftir því að tala við mig“

Á plöt­unni, sem kem­ur út 20. júní, má heyra frum­samda tónlist eft­ir Benja­mín Gísla auk ís­lenskra dæg­ur­laga í hans út­setn­ingu. Tit­ill­inn Schweiga­ards gate er vís­un í götu­heiti í Osló þar sem plat­an var tek­in upp yfir pásk­ana.

„Það var hálf­gerð til­vilj­un að þessi plata varð til og í raun­inni spratt hún út frá ákveðinni stemn­ingu sem ég var í yfir pásk­ana. Mig langaði til að gefa eitt­hvað út fyr­ir tón­leika­ferðalagið í sum­ar og hef alltaf haft þessa hug­mynd í koll­in­um, að spila inn lög hérna heima á pí­anóið.

Upp­haf­lega planið var að taka upp þrjú til fjög­ur lög en svo gerðist eitt­hvað þegar ég sett­ist við pí­anóið og upp­tak­an var kom­in af stað. Ég komst að því að ég átti miklu fleiri lög en ég hélt og svo endaði ég með 14 lög og plat­an varð til. Þetta var bæði óvænt og mjög gam­an,“ seg­ir Benja­mín Gísli og út­skýr­ir að reynd­ar hafi öll plat­an orðið til á ein­ung­is þrem­ur dög­um.

Plat­an Schweiga­ards gate varð til á nokkr­um dög­um yfir pásk­ana. Ljós­mynd/​Myriam Marti

„Yf­ir­leitt tek­ur svona ferli auðvitað frek­ar lang­an tíma, það þarf að plana allt og skipu­leggja, bóka stúd­íó og vinna tón­list­ina. En ég lokaði mig eig­in­lega af í þrjá daga yfir pásk­ana til að vinna í tón­list­inni og flest lög­in eru tek­in upp á föstu­deg­in­um langa. Þetta var sem sagt alls ekki planið en til­finn­ing­in var rétt.“

Hon­um þyki hress­andi að láta reyna á eitt­hvað nýtt og gera hlut­ina öðru­vísi en vana­lega.

„Tón­list­in verður heim­ild um augna­blik um leið og hún er leik­völl­ur til að prófa sig áfram. Útkom­an á þess­ari plötu er stemn­ings­rík tónlist í ein­föld­um út­setn­ing­um með klass­ísk­um blæ. Og það er ein­mitt það sem mér finnst svo skemmti­legt við plöt­una, hvað hún er ein­föld og tær.“

Feðgar á ferðalagi

Fram und­an eru síðan tíu tón­leik­ar á ell­efu dög­um vítt og breitt um landið, svo sem á Borg­ar­nesi, Eskif­irði, í Breiðdals­vík og í Mos­fells­dal.

„Mig langaði til þess að ferðast um og skoða landið og það var eig­in­lega ekki síst þess vegna sem ég fór að skipu­leggja þessa ferð. Það er nefni­lega allt of langt síðan ég fór síðast hring­inn. Ég hlakka til að leggja af stað, kynn­ast nýju fólki og skapa minn­ing­ar,“ seg­ir Benja­mín Gísli og nefn­ir að pabbi sinn ætli að slást með í för.

„Við ætl­um að skipt­ast á að keyra og ég held að þetta verði mik­ill gæðatími fyr­ir okk­ur feðgana.“

Með Höllu í höll­inni

Ný­verið tók Benja­mín Gísli einnig þátt í heim­sókn Höllu Tóm­as­dótt­ur, for­seta Íslands, til Nor­egs og lék tónlist sína fyr­ir gesti í mót­tök­unni fyr­ir norsku kon­ungs­fjöl­skyld­una.

„Ég fékk boð frá sendi­ráðinu um að spila í mót­tök­unni fyr­ir Höllu for­seta og þáði það að sjálf­sögðu. Tveim­ur vik­um fyr­ir mót­tök­una fékk ég síðan líka boð frá norsku kon­ungs­höll­inni í hátíðar­kvöld­verðinn. Og þá þurfti ég bara að stökkva til og leigja kjól­föt.

Þetta var eig­in­lega al­gjört ösku­buskuæv­in­týri frá upp­hafi til enda, ég fékk að sitja til borðs með þjóðþekkt­um ein­stak­ling­um og hlýða á ræðu Har­alds kon­ungs og hlusta á hirðhljóm­sveit­ina Gardem­usikk­en leika ís­lenska þjóðsöng­inn. Allt sam­an var þetta því­lík upp­lif­un og gam­an að fá að vera hluti af hátíðar­höld­un­um. Það rík­ir sam­heldni á milli þess­ara tveggja þjóða og mér var mjög vel tekið og er af­skap­lega þakk­lát­ur fyr­ir það.“

„Þetta var eig­in­lega al­gjört ösku­buskuæv­in­týri,“ seg­ir Benja­mín Gísli. Ljós­mynd/​Myriam Marti

Spurður hvort ís­lensku lög­in hafi fallið vel í kramið hjá Norðmönn­un­um svar­ar Benja­mín ját­andi.

„Al­gjör­lega. Mette-Ma­rit krón­prins­essa óskaði eft­ir því að tala við mig og eft­ir kvöld­verðinn var ég dreg­inn til hliðar til þess að spjalla við hana. Hún hef­ur nefni­lega gíf­ur­leg­an áhuga á djassi og sér­stak­lega á djasspí­anó­leik­ur­um og spurði mig al­veg spjör­un­um úr. Það var í raun­inni hálfsúr­realískt og ég fékk al­veg fiðrildi í mag­ann.“

Ekki aft­ur snúið

Að lok­um berst talið að sí­fellt breyti­legu lands­lagi djass­tón­list­ar­heims­ins í dag. Tel­ur þú að áhugi ungs fólks á Norður­lönd­um á djass­tónlist fari dvín­andi – eða jafn­vel, þvert á móti, vax­andi?

„Ég held að það sé eig­in­lega bæði og. Þetta kem­ur svo­lítið í bylgj­um. Núna kynn­ist ungt fólk að miklu leyti tónlist í gegn­um sam­fé­lags­miðla eins og TikT­ok og það er svo­lítið öðru­vísi en var áður. En ég held að áhug­inn sé til staðar, það þarf bara eitt­hvað til að virkja hann. Stund­um ger­ist til dæm­is eitt­hvað þegar maður mæt­ir á tón­leika, maður fær ein­hverja upp­ljóm­un og eft­ir það verður aldrei aft­ur snúið.

Þannig að ég hvet allt ungt fólk til að kíkja á tón­leika og helst nokkra mis­mun­andi, djass-, sin­fón­íu- og popp­tón­leika eða hvað sem er. Og gefa tón­list­inni séns í meira en nokkr­ar sek­únd­ur eins og á TikT­ok. Tón­list­in er ein­mitt svo mögnuð því hún teng­ir okk­ur sam­an og skap­ar upp­lif­an­ir,“ svar­ar Benja­mín.

Frek­ari upp­lýs­ing­ar um dag­skrá tón­leika­ferðalags­ins og plöt­una Schweiga­ards gate er að finna á vefn­um benjam­ing­isli.com. Ferðalagið hefst með tón­leik­um í Borg­ar­nes­kirkju fimmtu­dag­inn 19. júní kl. 20 og stend­ur til 29. júní.