Stjörnuspá fös. 21. jún. 2024

Stjörnuspá
fös. 21. jún. 2024

Hrútur
21. mars - 19. apríl

Fjárhagsleg velgengni er í nánd. Áætlun þín mun skila sér vel og skapa öryggi til framtíðar. Haltu áfram að sýna þolinmæði og úthald.

Naut
20. apríl - 20. maí

Nú er tíminn til að einbeita þér að persónulegum samböndum. Mundu að góð samskipti munu dýpka og styrkja böndin.

Tvíburar
21. maí - 20. júní

Heilsan er í forgangi í dag. Gefðu þér tíma til að slaka á og hlúa að líkama og sál. Jógaiðkun eða hugleiðsla gætu reynst þér vel.

Krabbi
21. júní - 22. júlí

Notaðu orkuna þína til að þróa ný verkefni og áætlanir í dag. Láttu hugmyndir þínar blómstra og deildu þeim með öðrum.

Ljón
23. júlí - 22. ágúst

Það skiptir öllu máli að vera sannur gagnvart sjálfum sér og öðrum. Það mun skila sér í velgengni bæði í starfi og einkalífi.

Meyja
23. ágúst - 22. september

Vertu opinn fyrir því að kynnast nýju fólki og stækka félagsnetið þitt. Þessi tengsl gætu reynst þér mikilvæg til framtíðar.

Vog
23. september - 22. október

Leiðtogahæfileikar þínir verða viðurkenndir. Gríptu tækifærið til að taka af skarið og sjálfstraust þitt mun þá skína í gegn.

Sporðdreki
23. október - 21. nóvember

Kannaðu nýjar slóðir og opnaðu nýja heima. Ferðalög og ný reynsla munu auðga líf þitt verulega á næstunni. Ævintýrin bíða.

Bogmaður
22. nóvember - 21. desember

Hugmyndir þínar munu bera ávöxt fjlótlega. Vertu hugrakkur og deildu þeim með öðrum en vertu einnig meðvitaður um smáatriðin.

Steingeit
22. desember - 19. janúar

Jafnvægi er lykillinn. Finndu leiðir til að skapa innri frið og harmóníu í daglegu lífi. Að stunda list eða tónlist gæti hjálpað.

Vatnsberi
20. janúar - 18. febrúar

Vertu vakandi fyrir nýjum tækifærum og ekki hika við að grípa þau þegar þau koma. Mundu að skipulag og nákvæmni leiða til árangurs.

Fiskar
19. febrúar - 20. mars

Stundum er sannleikurinn miklu tilþrifaminni en þú áttir von á. Ekki mikla málin fyrir þér. Markmiðin þín eru innan seilingar.

Hvernig eiga merkin saman?

Veldu stjörnumerki úr valgluggunum að neðan og smelltu svo á Birta.
og

NAUT

Nautið má iðulega þekkja á gildum hálsi, lágu enni og hrokknu hári og þau eru oftast íhaldssöm í klæðaburði, en geta þó ekki stillt sig um áberandi fylgihluti, t.d. skartgripi, bindi, sokka o.s.frv. Naut eru lífsnautnamenn og kunna vel að meta sætindi og góðan mat, eins og reyndar öll veraldleg gæði og líkamleg atlot, en þau eru líka stöðuglynd og þrjósk og hvika ekki út af þeirri leið sem þau velja sér. Þau eru lengi að taka ákvörðun, en þegar þau hafa gert það, getur ekkert stöðvað þau. Naut eru oft einkar séð í fjármálum og peningar skipta þau oft miklu máli, ekki síst vegna öryggisins sem þeir veita. Þau eru orðheldin, þolinmóð og trygglynd, og hafa einkar gott minni, en geta verið gríðarlega skapbráð, langrækin og afbrýðisöm og það getur verið nærri því ógerlegt að fá Nautið til að skipta um skoðun. Naut hafa næmt auga fyrir fegurð og listum, og oft hneigjast þau til starfa sem tengjast slíku, gjarnan innan bókmennta eða myndlistar, en ekki síður starfa innan fjármálaheimsins. Naut verða að gæta þess vel að staðna ekki í efnishyggju og gömlum gildum. Þau ættu að reyna að stokka tilveruna upp með reglulegu millibili og reyna eitthvað nýtt sem gæti víkkað sjóndeildarhringinn.

EINKENNI

  • Lykilorð: Stöðugleiki
  • Pláneta: Venus
  • Höfuðskeppna: Jörð
  • Litur: Blár
  • Málmur: Kopar
  • Steinar: Safír, jaði
  • Líkamshluti: Háls
  • Fræg naut Elizabeth II, Cher, Daniel Day Lewis, Jóhannes Páll páfi, Ólafur Ragnar Grímsson, Halldór Laxness, Florence Nightingale, Eva Peron, Ingólfur Margeirsson og Saddam Hussein.

TVÍBURAR

Pláneta Tvíburanna er Merkúr, sem kenndur er við sjálfan sendiboða guðanna, svo það er ekki að undra að Tvíburarnir séu alltaf á ferð og flugi. Þeir eru oft lágvaxnir, grannir og líkamlega veikbyggðir, en helst má þó þekkja Tvíburann á því að hann gerir margt í einu, talar mikið og gjarnan með miklu handapati og virðist aldrei geta verið kyrr. Tvíburinn er oftast gríðarlega forvitinn og hefur mikla þörf fyrir að skiptast á hugmyndum og skoðunum við aðra, enda vinnur fólk í Tvíburamerkinu iðulega við fjölmiðla eða sem sölumenn. Oftast eru Tvíburarnir fjölhæfir, greindir og fljótir að hugsa, einkum í öllum tjáskiptum, en þeir geta líka verið kaldhæðnir, hvikulir og óáreiðanlegir og fljótir að gleyma öllum loforðum. Þó að þeir hrífist af alls kyns hugmyndum, hafa þeir ekki endilega ýkja mikla þörf fyrir að sjá þeim hrint í framkvæmd. Tvíburar eru oftast daðurgjarnir og yfirborðskenndir og þeir tala stöðugt. Versti óvinur Tvíburans er leiðindi og hann gerir næstum hvað sem er til að komast hjá þeim. Tvíburinn ætti að reyna að hafa hemil á nýjungafíkn sinni og hviklyndi, ef hann vill ná góðum árangri í starfi og einkalífi.

EINKENNI

  • Lykilorð: Tjáskipti
  • Pláneta: Merkúr
  • Höfuðskeppna: Loft
  • Litur: Gulur
  • Málmur: Kvikasilfur
  • Steinar: Agat, raf
  • Líkamshluti: Hendur og lungu
  • Frægir tvíburar Bob Dylan, Kristján Jóhannsson, John Wayne, Guðrún Agnarsdóttir, Paul McCartney, Bubbi Mortens, Hrafn Gunnlaugsson, Thomas Mann, Tom Jones og Josephine Baker.

KRABBI

Krabbar eru oft búlduleitir og fölir, eins og plánetan þeirra, Tunglið. Þeir reyna að klæða sig eins og tíðkast í umhverfi þeirra, en fylgjast samt illa með tískunni og velja oft saman óheppilegar flíkur eða föt sem komin eru úr tísku. Krabbinn er trygglyndur, tilfinninganæmur og viðkvæmur og vill vernda aðra og hlú að þeim. Krabbar eru miklir fjölskyldumenn og líður yfirleitt best heima, innan um ættingja og nána vini. Þeir eru fúsir að hlusta á vandamál annarra, gefa góð ráð og miðla af reynslu sinni, en þeir eru líka auðsærðir og spéhræddir og gleyma aldrei því sem gert er á hluta þeirra. Krabbinn býr yfir miklu innsæi og djúpum tilfinningum en honum hættir til tortryggni og drottnunargirni og öðrum finnst oft að hann sé að kæfa þá með tilfinningum. Viðskipti eiga vel við Krabbann, einkum lítil fyrirtæki og þá gjarnan fjölskyldufyrirtæki, en Krabbinn er líka hrifinn af góðum mat og matargerð, svo honum lætur ágætlega að reka veitingahús. Kröbbum hættir til að hafa óþarfa áhyggjur af öllu milli himins og jarðar, og þeir þurfa að læra að gera greinarmun á því og eðlilegri varkárni, svo lífið verði þeim ekki of þungbært.

EINKENNI

  • Lykilorð: Tengsli
  • Pláneta: Tungl
  • Höfuðskeppna: Vatn
  • Litur: Grár
  • Málmur: Silfur
  • Steinar: Perla, mánasteinn
  • Líkamshluti: Brjóst og magi
  • Frægir krabbar Díana prinsessa, Ernest Hemingway, Ingmar Bergman, Franz Kafka, Bryndís Schram, Mike Tyson, Rose Kennedy, Raymond Chandler, Tom Cruise og Stefán Hilmarsson.

LJÓN

Ljónið fer aldrei framhjá neinum, enda telur það sig "konung dýrahringsins"! Það er oft beint í baki, mittismjótt og með stutta fótleggi og hættir til að fitna, en fer yfirleitt ekki í megrun fyrr en slíkt er óumflýjanlegt. Ljón fylgja yfirleitt tískunni og eru vel klædd, en hættir samt til öfga. Þau eru veik fyrir skrauti og skartgripum, ekki síður en gullhömrum og aðdáun. Ljón hafa mikla þörf fyrir að vekja athygli og vilja vera miðpunktur hvar sem þau eru stödd. Þau eru opin, félagslynd og skapandi, hjartahlý og lífsglöð. Merkið er oft sett í samband við börn og skemmtanir og Ljón hafa gaman af að leika sér, en þau geta líka verið hrokafull, sjálfumglöð og eigingjörn. Ljón eru í eðli sínu örlát og bjartsýn og eldmóðurinn er gríðarlegur, ekki síst í ástamálum, þar sem þau upphefja hvert einasta smáskot og líta á það sem rómantíska stórmynd þar sem þau leika sjálf aðalhlutverkið. Ást Ljónsins á hinu leikræna verður oft til þess að það reynir fyrir sér í skemmtanaiðnaðinum, einkum leiklist og rokktónlist, en reyndar er Ljónið ánægt alls staðar þar sem það fær að njóta sín og vekur athygli. Þó að annað fólk laðist yfirleitt að Ljóninu, öðlast það ef til vill mesta lífshamingju ef því tekst að þjálfa með sér hæfileika til að taka sjálft sig ekki alltof hátíðlega.

EINKENNI

  • Lykilorð: Sjálfstjáning
  • Pláneta: Sól
  • Höfuðskeppna: Eldur
  • Litur: Appelsínurauður
  • Málmur: Gull
  • Steinar: Demantur, bergkristall, kórall
  • Líkamshluti: Hjarta og bak
  • Fræg ljón Napóleon, Mata Hari, Emily Bronte, Carl Jung, Thor Vilhjálmsson, Antonio Banderas, Árni Sigfússon, Mae West, Bill Clinton og Madonna.

MEYJA

Meyjur eru gjarnan auðþekkjanlegar af háum kollvikum, en þá ekki síður stórum og hreinum augum. Þær klæða sig tilgerðarlaust og smekklega, en elta ekki endilega nýjustu tískugrillur. Þær eru hagsýnar og duglegar, en lítið gefnar fyrir langar og hugmyndafræðilegar samræður og vilja miklu frekar láta verkin tala. Meyjur vilja helst vera á fartinni, ekki þó stefnulaust heldur að sinna einhverjum verkefnum. Líkt og önnur jarðarmerki eru þær holdlegar og veraldlegar, en beita orku sinni yfirleitt á hagnýtan og vinnutengdan hátt. Þær hafa mikla skipulags- og aðlögunarhæfileika, en eru haldnar fullkomnunaráráttu og geta búið yfir óhóflega mikilli sjálfsgagnrýni og smámunasemi. Meyjur hafa rökfasta hugsun og oft hvassa tungu, og þær eiga bágt með að þola hirðuleysi og slóðaskap. Þær eru áreiðanlegar og hjálpsamar og fúsar að vera öðrum innan handar. Meyjum lætur ágætlega hjúkrun og reyndar hvert það starf sem krefst nákvæmni og sjálfsaga, t.d. úrsmíði eða tölvuvinna af öllu tagi. Þær eru smekkvísar og gætu gert það gott sem fatahönnuðir eða í listiðnaði, helst þá þeim greinum þar sem notuð eru jarðarefni, t.d. við leirkeragerð eða textílvinnu. Meyjan ætti að sinna betur ímyndunaraflinu og láta stundum eftir skyndilegum hugdettum í stað þess að láta skynsemina alltaf ráða ferðinni og einblína stöðugt á vinnu. Þannig gæti hún náð betra andlegu jafnvægi.

EINKENNI

  • Lykilorð: Skipulagning
  • Pláneta: Merkúr
  • Höfuðskeppna: Jörð
  • Litur: Brúnn og grænn
  • Málmur: Kvikasilfur
  • Steinar: Smaragður, malakít
  • Líkamshluti: Meltingarkerfi
  • Frægar meyjur Gene Kelly, Steinunn Sigurðardóttir, Sophia Loren, Sean Connery, Claudia Schiffer, Michael Jackson, Greta Garbo, Leonard Cohen og Ómar Ragnarsson.

VOG

Vogir vekja oft rómantískar tilfinningar og þykja kynþokkafullar, enda klæða þær sig oft djarflega og tælandi. Einna mest áberandi í fari þeirra er þó hvað þær eru blátt áfram og óþvingaðar, enda er Vogin merki félagslegra samskipta. Þær eru gæddar miklum persónutöfrum en eru oft dular og vilja ekki bera vandamál sín á torg og þær eiga líka oft erfitt með að taka ákvarðanir. Engu að síður er þeim mikið í mun að ná markmiðum sínum, hvort sem það er félagslega eða í samböndum, t.d. hjónabandi. Vogin er í eðli sínu diplómatísk og mikill sáttasemjari og á auðvelt með að lægja öldur. Vogir hafa sterka réttlætiskennd, en þola illa háværar deilur og ósamlyndi af öllu tagi. Þær vilja mjög gjarnan fá að vita að þær séu mikils metnar og eiga bágt með að vera einar. Þess vegna velja þær sér oft störf, þar sem mannleg samskipti eru í fyrirrúmi, og Vogin nýtur sín einkar vel í opinberu starfi. Voginni hættir til að gera öðrum hærra undir höfði en sjálfri sér og mætti gjarnan tileinka sér meiri sjálfsþekkingu og ýtni, ekki síst ef hún ætlar að ná frægð og frama.

EINKENNI

  • Lykilorð: Jafnvægi
  • Pláneta: Venus
  • Höfuðskeppna: Loft
  • Litur: Ljóslár
  • Málmur: Kopar
  • Steinar: Lapis lazuli, rósarkvarts
  • Líkamshluti: Nýru
  • Frægar vogir John Lennon, Julio Iglesias, Doris Lessing, Cervantes, Tim Robbins, Silja Aðalsteinsdóttir, Ólafur Jóhann Ólafsson, Bera Nordal, Ben Gurion og Buster Keaton.

SPORÐDREKI

Sporðdrekar eru oftast grannir, með hvöss og djúp augu og þungar augabrýr. Þeir eru yfirleitt afar kynþokkafullir og klæða sig líka þannig, gjarnan í flegnar blússur eða svört leðurföt. Sporðdreki er vatnsmerki og tengist djúpum tilfinningum, yfirleitt þeim sem snerta kynlíf og sjálfsbjargarhvöt. Það er oft sagt, að Sporðdrekinn sé misskildasta merki dýrahringsins, og flestum þykir fólk fætt í því merki leyndardómsfullt og spennandi. Undir heilsteyptu ytra borði Sporðdrekans leynist oft gríðarleg tilfinningaólga, afbrýðisemi og ástríða, og fólk í þessu merki reynir af fremsta megni að skapa sér tilfinningalegt öryggi í heimi sem því finnst fjandsamlegur. Sporðdrekar hafa mjög næma eðlisávísun og fæstir geta farið á bak við þá, og þeir hafa oftast mikinn áhuga á yfirskilvitlegum efnum.Þeir eru hefnigjarnir en einbeittir og þolgóðir og gefast ekki upp fyrr en í fulla hnefana. Sporðdrekar væru framúrskarandi byltingarmenn, einkum af öfgakenndara taginu, en þeir kasta sér reyndar af ástríðu út í hverja þá vinnu sem vekur áhuga þeirra og kitlar ímyndunaraflið. Í íþróttum velja þeir sér iðulega eitthvað sem hætta fylgir (eða gæti fylgt), t.d. skylmingar, karate og teygjuhopp, en þeir hafa líka yndi af dansi og tónlist. Til að öðlast lífshamingju, þarf Sporðdrekinn að reyna að sigrast á innri ótta sínum og sálarkvölum, sem þeir eiga erfiðara með að leiða hjá sér en aðrir.

EINKENNI

  • Lykilorð: Tilfinningadýpt
  • Pláneta: Plútó
  • Höfuðskeppna: Vatn
  • Litur: Dökkrauður
  • Málmur: Járn
  • Steinar: Granat, ópall, túrmalín
  • Líkamshluti: Kynfæri
  • Frægir sporðdrekar Þorsteinn Pálsson, Charles Brosnan, John Cleese, Kevin Kline, Valdís Gunnarsdóttir, Flosi Ólafsson, Björk, Danny Devito, Goldie Hawn og Demi Moore.

BOGMAÐUR

Bogmenn hafa hátt enni og beinar augabrýr. Þeir klæðast gjarnan íþróttagöllum eða öðrum tilgerðarlausum fatnaði, en eru sjaldnast hirðuleysislegir. Bogmenn eru gjarnan miklir matmenn, en þeir eru líka mikið gefnir fyrir íþróttir, svo þeir fara yfirleitt ekki að fitna fyrr en upp úr miðjum aldri, þegar þeir hætta að hreyfa sig eins mikið. Bogmenn hafa einlæga ást á sannleika og réttlæti, en hættir til að láta skoðanir sínar alltof opinskátt í ljós, iðulega óumbeðnir! Bogmenn hafa líka djúpa þörf fyrir að víkka sjóndeildarhring sinn og hafa því mörg áhugamál, auk þess sem þeir hafa sérstakt dálæti á ferðalögum. Þeir eru lífsglaðir, opnir og hreinskilnir mannvinir, en hafa litla þolinmæði með smávægilegum vandamálum hversdagslífsins. Þeir hafa lítinn áhuga á fjármálum og helst iðulega illa á peningum, enda margir Bogmenn veikir fyrir fjárhættuspilum. Bogmenn velja sér oft starf þar sem þeir eru mikið á ferð og flugi. Þeir eru fyrirtaks leiðsögumenn, íþróttamenn eða íþróttaþjálfarar eða jafnvel áhættuleikarar í kvikmyndum, en þeir væru líka í essinu sínu ef þeir ynnu í spilavíti! Bogmenn þola síst af öllu yfirborðsmennsku og mættu oft tileinka sér meira umburðarlyndi gagnvart almennum kurteisisvenjum og siðum.

EINKENNI

  • Lykilorð: Innsæi
  • Pláneta: Júpíter
  • Höfuðskeppna: Eldur
  • Litur: Fjólublár
  • Málmur: Tin
  • Steinar: Túrkís, tópas
  • Líkamshluti: Grindarhol, mjaðmir, læri
  • Frægir bogmenn Guðrún Gísladóttir, Nostradamus, Maria Callas, Julie Harris, Hermann Gunnarsson, Jeff Bridges, Steven Spielberg, Woody Allan, Einar Kárason og Frank Sinatra.

STEINGEIT

Steingeitin rennur oftast saman við fjöldann, því hún er bæði hógvær í klæðaburði og framkomu. Steingeitur skeyta lítið um tískufyrirbæri og klæðast oft íhaldssömum, dökkum fötum úr vönduðu efni, jafnvel þegar þær fara í samkvæmisskrúðann. Þær eru iðjusamar og þægilegar í viðmóti, vinna skipulega að langtíma markmiðum og stefna að því að öðlast viðurkenningu og virðingu fyrir erfiði sitt. Steingeitin er þolinmóð og yfirleitt metnaðargjörn, einræn og seintekin, en trygg vinum sínum og fjölskyldu og mjög áreiðanleg í öllum samskiptum. Veraldleg gæði, vegtyllur og vald skipta Steingeitina miklu máli og hún er íhaldssöm á umhverfi sitt og á bágt með að sætta sig við breytingar. Steingeitinni lætur best að vinna þar sem hún getur hækkað í stöðu, en ef hún starfar innan stjórnmálaflokks, hentar henni betur að aðrir standi í sviðsljósinu á meðan hún hefur sjálf töglin og hagldirnar á bakvið tjöldin. Í íþróttum heillast hún yfirleitt af greinum, þar sem hún þarf að sigrast á erfiðleikum, t.d. fjallgöngum eða skíðagöngum. Steingeitinni hættir til að halda óþarflega mikið aftur af tilfinningum sínum og sjálfsagi hennar og sjálfsafneitun gengur oft út í öfgar. Hún ætti að reyna að vera næmari á þarfir annarra og tilfinningar og losa sig við stífni og óþarfa hlédrægni, en það stafar oft af erfiðri æsku.

EINKENNI

  • Lykilorð: Metnaður
  • Pláneta: Satúrnus
  • Höfuðskeppna: Jörð
  • Litur: Svartur, dökkgrár
  • Málmur: Blý
  • Steinar: Svartur ónyx, obsídían
  • Líkamshluti: Hné, liðamót, húð, bein
  • Frægar steingeitur Davíð Oddsson, Nicolas Cage, Ólafur Skúlason, Nixon, Henri Matisse, Janis Joplin, Mao, Bjarni Felixson, Anthony Hopkins og Denzel Washington.

VATNSBERI

Vatnsberar eru oft háir og glæsilegir, með loðnar augabrýr og óstýrilátt hár, og þeir klæðast gjarnan dýrum og nýtískulegum fötum, en yfirleitt skapa þeir sér þó eigin fatastíl. Vatnsberar eru sjálfstæðir í hugsun og fylgja ekki viðteknum skoðunum og þeir vilja einlæglega berjast gegn alls kyns óréttlæti, ekki síst félagslegu. Vatnsberinn er vingjarnlegur og opinn í framkomu og nýtur sín vel í félagslegu samhengi, bæði í stærri og minni hópum. Þeir eru ævintýragjarnir og stundum sérvitrir, eiga til bæði önuglyndi og þrjósku, ekki síst ef þeir neyðast til að verja eigin sérlyndi. Þeir eru hins vegar óþreytandi að berjast fyrir minni máttar. Vatnsberinn er frumlegur í hugsun, og velur sér gjarnan óvenjulegt starfssvið, eins og t.d. stjörnufræði, fornleifafræði eða annað vísindatengt, en þeir gætu allt eins tekið upp á því að gerast flugmenn eða skrifa vísindaskáldsögur! Þrátt fyrir mannúðlegt hjartalag er Vatnsberinn oft fjarlægur og erfitt að ná sambandi við hann, svo hann ætti að reyna að vera hlýlegri í framkomu og reyna að gefa meira af sjálfum sér.

EINKENNI

  • Lykilorð: Félagslegar hugsjónir
  • Pláneta: Úranus
  • Höfuðskeppna: Loft
  • Litur: Himinblár
  • Málmur: Úraníum
  • Steinar: Aquamarín, túrmalín
  • Líkamshluti: Fótleggir, ökklar, blóðrás
  • Frægir vatnsberar Elín Pálmadóttir, John Travolta, Michael Jordan, Karólína prinsessa, Galileo, Ronald Reagan, Gertrude Steiner, Vanessa Redgrave, Virginia Woolf og Lord Byron.

FISKAR

Augu Fisksins eru falleg og tjáningarrík og fatastíllinn er afar persónulegur, oft með frumlegu mynstri og sniði eða á hinn bóginn gömul, snjáð föt sem eigandinn hefur notað árum saman. Fiskar hafa afar mikinn áhuga á fótum og fótabúnaði, sem getur einkennst af sömu öfgum og annar fatnaður, en fætur Fisksins eru oft fallega lagaðir og nettir. Fiskar eru oftast miklir dansmenn og hafa yndi af allri tónlist. Þeir eru víðsýnir og nægjusamir og láta vel að stjórn, nema þegar þeir eru beittir þrýstingi. Fiskarnir eru einkar uppteknir af þjáningum annarra, og reyndar líka sínum eigin, og margir í þessu merki finna hjá sér þörf fyrir píslarvætti. Fiskar eru rómantískir og dreymnir og hafa djúpa ást á lífinu, en láta sig oft reka með straumnum og eru litlir baráttumenn, enda eiga þeir bágt með að vinna markvisst. Þeir hafa næma eðlisávísun og eru mjög hjartahlýir og hjálpsamir, enda eru þeir oft vinamargir, en stundvísi er ekki þeirra sterkasta hlið. Fiskar hafa mikla sköpunargáfu og finna sér oft starf sem tengist listum, gjarnan ljóðlist eða rómantískum bókmenntum, og margir Fiskar eru tónlistarmenn eða vinna við kvikmyndir. Fiskar hafa líka einlægan áhuga á náttúrunni og umhverfisvernd, trúarbrögðum og félagslega bágstöddu fólki, svo störf á þeim vettvangi gætu veitt þeim mikla ánægju. Draumlyndi Fisksins veldur því hins vegar að hann verður oft fyrir vonbrigðum í lífinu og hann mætti gjarnan tileinka sér raunsærri lífssýn á ýmsum sviðum.

EINKENNI

  • Lykilorð: Upphafning
  • Pláneta: Neptúnus
  • Höfuðskeppna: Vatn
  • Litur: Sægrænn
  • Málmur: Tin
  • Steinar: Ametýst, ópall
  • Líkamshluti: Fætur, sogæðakerfi
  • Frægir fiskar Cindy Crawford, Michelangelo, Glenn Miller, Fabio, Peter Fonda, Árni Johnsen, Kurt Russel, Hannes Hólmsteinn Gissurarson og Nat King Cole.