Flogið verður með um 800 Tsjada frá Bangui, höfuðborg Mið-Afríkulýðveldisins, til heimalands síns í dag en tugþúsundir útlendinga verða fluttir frá Mið-Afríkulýðveldinu næstu daga. Breska ríkisútvarpið greinir frá þessu.

Michel Djotodia, forseti Mið-Afríkulýðveldisins, sagði af sér í gær, ásamt Nicolas Tiengaye,  forsætisráðherra landsins. Í frétt breska ríkisútvarpsins segir að þúsundir hafi fagnað afsögn Djotodia og Tiengaye á strætum Bangui, höfuðborg landsins, í gær.

Í gær komu leiðtogar tíu Afríkuríkja saman til að ræða framtíð Djotodia en talið er að þeir hafi krafist þess að hann segði af sér. Segja þeir að honum hafi mistekist að stilla til friðar. Tæplega sex þúsund erlendir hermenn eru nú í landinu og reyna þeir eftir fremsta megni að stilla til friðar.

Talið er að 33 þúsund ríkisborgarar frá nágrannalöndum Mið-Afríkulýðveldisins séu í landinu og þurfi á hjálp að halda vegna átakanna og við að komast aftur heim. Að minnsta kosti 1.000 manns hafa látið lífið frá því átök brutust út í landinu í desember.

Tsjadarnir sem fluttir verða úr landinu í dag eru meðal nærri 2.500 Tjasda sem hafast við í bráðabirgðabúðum við alþjóðaflugvöllinn í Bangui.

Þúsundir Tjasda hafa flúið landið á síðustu vikum. Alþjóðasamtökin International Organization for Migration segja að margir sem hafi ákveðið að yfirgefa landið upp á eigin spýtur hafi lent í hættulegum aðstæðum við landamærin. Konur og börn eru í meirihluta.