Ju­lie Gayet, ást­kona Franco­is Hollande Frakk­lands­for­seta, er af­kasta­mik­il leik­kona sem hef­ur leikið í um sjö­tíu kvik­mynd­um. Upp komst um fram­hjá­hald for­set­ans í byrj­un janú­ar og í gær til­kynnti hann sam­bands­slit sín við sam­býl­is­konu sína til margra ára, Val­erie Trierweiler. Eng­ar frétt­ir hafa borist af því hvort sam­band þeirra Gayet og Hollande standi enn. Komið hef­ur fram að lík­lega hafi þau byrjað að vera sam­an áður en hann var kos­inn for­seti árið 2012. 

Hún er grann­vax­in, bros­mild og með kast­aníu­brúnt hár. Hin 41 árs gamla Ju­lie Gayet hef­ur leikið fjöl­breytt hlut­verk, í róm­an­tísk­um gam­an­mynd­um sem og í drama­tísk­um mynd­um og hroll­vekj­um. 

En allt frá því að upp komst um fram­hjá­hald for­set­ans hef­ur hún haldið sig til hlés. Hún hef­ur þó höfðað mál á hend­ur tíma­rit­inu Closer sem birti fyrst allra frétt­ina um ástar­sam­bandið, fyr­ir brot á friðhelgi einka­lífs henn­ar. Hún fer fram á háar bæt­ur frá blaðinu.

hinn 10. janú­ar birti Closer grein um að Hollande, sem er 59 ára, ætti oft ástar­fundi með Gayet í íbúð í ná­grenni for­seta­hall­ar­inn­ar í Par­ís. Meðal ann­ars kom fram að líf­vörður hans færði þeim skötu­hjú­um brauðhorn á morgn­ana.

Hollande hafði ekki tjáð sig um málið fyrr en í gær er hann loks til­kynnti að hann og Trierweiler væru skil­in.

Trierweiler brá svo við frétt­irn­ar um fram­hjá­haldið að hún var lögð inn á sjúkra­hús í viku.

Hollande hef­ur þekkt Gayet að minnsta kosti frá ár­inu 2012 en þá tók hún þátt í kosn­inga­bar­áttu hans. Hún kom m.a. fram í aug­lýs­ingu þar sem hún lýsti Hollande sem „auðmjúk­um“ og „frá­bær­um“ manni.

Gayet er þekkt fyr­ir að standa á sínu og ný­verið studdi hún op­in­ber­lega hjóna­bönd sam­kyn­hneigðra í land­inu. 

Leik­kon­an er fædd í Sures­nes-hverf­inu í Par­ís 3. júní árið 1972. Hún nam leik­list og lista­sögu á yngri árum. Hún var m.a. í starfs­námi hjá Jack Waltzer í Actors Studio í London og lærði einnig söng í Par­ís.

Leik­list­ar­fer­ill henn­ar hófst árið 1993 með hlut­verk­um í mynd­un­um Little Apoca­lyp­se og Blue eft­ir Krzysztof Kieslowski. En það var hlut­verk henn­ar í gam­an­mynd­inni Delp­hine 1, Yvan 0, sem kom út árið 1996, sem skaut henni upp á stjörnu­him­in­inn.

Hún fylgdi vel­gengn­inni eft­ir með mynd­inni Select Hotel í leik­stjórn Laurent Bou­hnik. Þar fór hún með hlut­verk vænd­is­konu í fíkni­efna­neyslu. Fékk hún hin virtu frönsku kvik­mynda­verðlaun, Romy Schnei­der, fyr­ir það hlut­verk. 

Gayet er þekkt fyr­ir að vera djörf í hlut­verka­vali. „Það sem ég kann að meta við þetta fag er að hverfa inn í ann­an heim,“ sagði hún í viðtali árið 2002.

Árið 2007 stofnaði hún lítið kvik­mynda­fram­leiðslu­fyr­ir­tæki sem heit­ir Fix Me. Í fyrra var hún svo aðstoðarleik­stjóri heim­ild­ar­mynd­ar um kvik­mynda­gerðarfólk.

Gayet á tvö börn á ung­lings­aldri með arg­entínska rit­höf­und­in­um og hand­rits­höf­und­in­um Santiago Amig­or­ena.

Forsíða Closer þann 10. janú­ar. AFP

Franco­is Hollande og fyrr­ver­andi sam­býl­is­kona hans, Val­erie Trierweiler. EPA