Jón Baldvin Hannibalsson | 12. febrúar 2021

Lögmenn tókust á um mál Jóns Baldvins

Aðalmeðferð í máli Jóns Baldvins Hannibalssonar gegn fjölmiðlamanninum Sigmari Guðmundssyni, Ríkisútvarpinu og Aldísi Schram, dóttur Jóns, hélt áfram í Héraðsdómi Reykjavíkur í dag en í dag fór fram munnlegur málflutningur lögmanna Aldísar og Sigmars.

Lögmenn tókust á um mál Jóns Baldvins

Jón Baldvin Hannibalsson | 12. febrúar 2021

Jón Baldvin Hannibalsson höfðaði mál á hendur Aldísi og Sigmari en RÚV sinnir réttargæslu fyrir Sigmar. mbl.is/Kristinn Magnússon

Vilhjálmur H. Vilhjálmsson, lögmaður Jóns Baldvins Hannibalssonar, sagði á réttarhöldunum að öll ummælin sem Jón Baldvin hefur stefnt Aldísi og Sigmari fyrir hafi falið í sér ásakanir um lögbrot. Þá sagði Vilhjálmur ljóst að Sigmar bæri ábyrgð á þeim ummælum sem hann „samdi og las í eigin nafni“.

Lögmaður Sigmars, Stefán A Svensson, mótmælti þessu og sagði ljóst að Sigmar hefði vitnað í ummæli Aldísar þegar hann flutti fréttir af málinu og væri því ekki brotlegur. Það væri ekki rétt að Sigmar fullyrti í eigin persónu að Jón Baldvin hefði gerst sekur um sifjaspell, hann hefði einfaldlega vitnað í ummæli Aldísar um málið.

Aldís Schram gengur inn í réttarsal. mbl.is/Kristinn Magnússon

Fela í sér refsiverða háttsemi

Ummæli Sigmars og Aldísar má, að sögn Vilhjálms, flokka í þrjá flokka. Í fyrsta lagi eiga ummælin við um meinta ólögmæta frelsissvipting Aldísar sem hún hefur sagt föður sinn hafa knúið fram, í öðru lagi snerta þau meint barnaníð og barnagirnd stefnanda og í þriðja lagi varða ummælin sifjaspell sem Aldís hefur sakað föður sinn um að hafa framið gagnvart henni.

Vilhjálmur sagði ljóst að öll ummælin fælu í sér ásökun um refsiverða háttsemi. Það væri á ábyrgð Aldísar og Sigmars að haga ummælum sínum með þeim hætti að í þeim fælust gildisdómar en ekki staðhæfingar um staðreyndir.

„Öll þessi ummæli fela í sér ásökun um refsiverða háttsemi,“ sagði Vilhjálmur. Þá sagði hann að almennt væri gengið út frá því í dómaframkvæmd Hæstaréttar og með staðfestingu Mannréttindadómstóls Evrópu að staðhæfingar um staðreyndir sem ekki hefur verið sýnt fram á að eigi í sér stoð í raunveruleikanum séu ærumeiðandi aðdróttanir.

Sigmar Guðmundsson fréttamaður á réttarhöldum miðvikudagsins. mbl.s/Kristinn Magnússon

Hringdi, sendi sms og tölvupóst

Vilhjálmur sagði að Sigmar hefði óskað eftir viðbrögðum frá Jóni Baldvini „korteri áður“ en viðtalið var birt og það ætti að mega búast við meiru af Sigmari, reyndum fréttamanni, og Ríkisútvarpinu.

Þetta sagði Stefán augljóslega ekki rétt, enda liggur fyrir að Sigmar hringdi í Jón Baldvin, sendi honum smáskilaboð og konu hans tölvupóst daginn áður en viðtalið var birt.

„Þetta er ekki sett fram í neinu tómarúmi,“ sagði Stefán um viðtal Sigmars við Aldísi og vísaði í að umræða hefði farið fram á Facebook um meint kynferðisbrot Jóns Baldvins. Þá benti Stefán á að Jón Baldvin væri opinber persóna.

Gunnar Ingi Jóhannsson, lögmaður Aldísar, flytur sitt mál innan skamms.

Ummæli sem Jón Baldvin fer fram á að dæmd verði dauð og ómerk eru eftirfarandi:

Morgunútvarp, Rás 2, 17. janúar 2019, ummæli viðhöfð af Aldísi:

... hann fær mig undir fölsku yfirskini að heimsækja afa minn ... mér var haldið inni þarna í mánuð sem sagt ólöglega.
... já. Fimm sinnum á næstu 10 árum kastast í kekki milli mín og Jóns Baldvins Hannibalssonar og því lyktaði ávalt með því að [sic] sigaði á mig lögreglu sem handtók mig, hann er náttúrulega utanríkisráðherra ...
Hann gat bara þaðan í frá, þáverandi utanríkisráðherra og síðar sendiherra, virðist vera að hringja bara í lögreglu og þá var ég þar með handtekin, umsvifalaust í járnum, farið með mig upp á geðdeild ...
... hann er þá líka að misnota lítil börn.
... ég neita að skilja þau eftir í umsjón karls sem káfar á litlum stúlkubörnum.
Og sem sagt 10 mínútum eftir að ég kæri Jón Baldvin þá hringir dyrabjallan. Þar ruddust þarna inn tveir lögreglumenn ef ekki þrír og ég, þegar ég sé það þá reyni ég að loka en auðvitað tókst mér það ekki, þeir ryðjast þá þar með inn og þeir svara mér engu, ryðjast inn í stofu þar sem dóttir mín 5 ára gömul er að lesa og þegar barnið er tekið frá mér þá verð ég æf.
... það er faðir minn sem stendur fyrir því að hér eigi að loka mig inni.
Fíkn, auðvitað er barnagirnd fíkn, þetta er fíkn.
... nauðungarvistun án dóms og laga er þá ólögmæt frelsissvipting ...

Facebook, 5. febrúar 2019, höfundur Aldís:

... og sigra hann og hans barnaníðingabandalag.

Rás 2, 17. janúar 2019, höfundur og flytjandi Sigmar (Aldís til vara):

... að Jón Baldvin hafi notað aðstöðu sína sem sendiherra til að láta nauðungarvista hana á geðdeild.
Sá fundur Aldísar og Jóns Baldvins segir hún hafa reynst sér örlagaríkur og orðið til þess að hún var í fyrsta sinn nauðungarvistuð á geðdeild.
... að Jón Baldvin hafi sett sig í samband við félagsmálayfirvöld og geðdeild með það fyrir augum að fá hana nauðungarvistaða í enn eitt skiptið.
Þar segir hún einnig að Jón Baldvin hafi framið sifjaspell þegar hún var fullorðin kona.