Enn hefur ekki verið ráðist í viðgerð vegna leka í húsnæði sundlaugarinnar vinsælu. Rúmt ár er liðið síðan rakaskemmdir greindust í kjallara hússins þar sem heilsurækt Reebok er nú rekin. Staðfest var að mygla hefði greinst og í kjölfarið var umrætt svæði hreinsað og gerðar lagfæringar. „Það greindist mygla þarna niðri og sú mygla var hreinsuð í burtu. Síðan voru tekin sýni og þau reyndust myglufrí,“ segir Jakob en lekinn er enn til staðar. Hann er úr votrými í karlaklefa sundlaugarinnar og hefur fötu verið komið fyrir í kjallaranum til að taka á móti vatninu. Óánægju hefur gætt meðal gesta af þessum sökum, samkvæmt upplýsingum blaðsins.

Jakob segir að flókið gæti reynst að finna nákvæmlega hvar lekur í gegn. Því hafi ekki verið hætt á að hefja viðgerðir enn, enda myndi það kalla á tilfærslur. „Krakkarnir í skólasundinu myndu þurfa að fara í búningsklefa niðri og þá væri löng leið að lauginni. Við viljum ekki taka séns á að því að þau fari eitthvað annað. Þarna togast því á öryggismál barnanna og öryggismál annarra gesta,“ segir forstöðumaðurinn. Hann játar því að ástandið sé óboðlegt og að þörf gæti verið á því að taka annað sýni vegna myglu. Mygla gæti myndast í loftinu þar sem vatnið lekur niður. „Viðgerðin fer væntanlega fram í júní,“ segir Jakob.