Ríkisstjóri Oregon-ríkis og borgarstjóri Portlands hafa lýst yfir 90 daga neyðarástandi vegna öldu dauðsfalla í Portland af völdum fentanýl-notkunar.

„Landið okkar og ríki okkar hafa aldrei séð eiturlyf jafn banvænt og ávanabindandi og allir eru að glíma við það hvernig eigi að bregðast við,“ sagði ríkisstjórinn Tina Kotek í tilkynningu.

CNN greinir frá.

Árið 2020 varð Oregon fyrsta ríkið í Bandaríkjunum til að afglæpavæða fíkniefni. Í kjölfar þess hefur neysla fíkniefna aukist og dauðsföllum af völdum of stórra skammta fjölgað.

Árið 2019 voru dauðsföll af völdum ópíóðaneyslu 280 talsins í Oregon en árið 2022 voru þau orðin 956.

Frétt af mbl.is

Snúa við af vegi afglæpavæðingar fíkniefna

Tryggir betra samstarf hjá hinu opinbera

Kotek segir að með því að lýsa yfir neyðarástandi verði hægt að tryggja betra samstarf á milli aðila til að finna einhverja lausn á þessu risavaxna vandamáli.

Að lýsa yfir neyðarástandi gerir borginni, ríkinu og sýslunni kleift að úthluta fjármagni til viðbragða við eiturlyfjafaraldrinum og koma upp stjórnstöð í miðborginni.

Verður aukin áhersla lögð á að ná til fíkla, koma þeim í meðferð og tryggja þeim húsakost.

Eins og greint hefur verið frá þá hafa ríkisþing­menn Demókrata í Or­egon boðað nýtt frum­varp sem myndi gera vörslu lít­ils magns fíkni­efna aft­ur að minni­hátt­ar af­broti.