Konan sem leigubílstjórinn Abdul Habib Kohi var nýlega dæmdur fyrir að brjóta gegn var nýorðin 17 ára gömul þegar nauðgunin átti sér stað árið 2022. Lífsýni úr Abdul fundust meðal annars á brjóstum stúlkunnar. Brotin áttu sér ítrekað stað frá Hafnarfirði að Reykjanesbæ.

Þetta kemur fram í dómi Héraðsdóms Reykjavíkur. Eins og mbl.is greindi frá í síðustu viku þá var maðurinn dæmdur í tveggja ára fangelsi, en þá var ekki búið að birta dóminn á vef dómstólanna.

Er Abdul gert að greiða brotaþolanum 1.800.000 krónur, auk vaxta, í miskabætur. Þá ber honum að auki að greiða rúmlega 3,5 milljónir króna í lögfræðikostnað og annan sakarkostnað.

Fékk konan far með honum aðfaranótt sunnu­dags­ins 25. sept­em­ber árið 2022 frá miðbæ Reykjavíkur til Reykjanesbæjar. Í framburði konunnar kom fram að maðurinn hafi fyrst brotið á henni þegar komið var í Hafnarfjörð og gerði hann það meðal annars með því að þukla á brjóstum hennar og kynfærum. 

Frétt af mbl.is

Leigubílstjóri dæmdur fyrir að nauðga farþega

Framburður leigubílstjórans ótrúverðugur

Á Reykjanesbrautinni stoppaði leigubílstjórinn bifreiðina við Grindavíkurafleggjarann svo að hún gæti kastað upp. Eftir það settist hún aftur inn í bílinn og leigubílstjórinn byrjaði að kyssa hana gegn hennar vilja. Lagði leigubílstjórinn svo aftur af stað og á meðan hann ók bifreiðinni nuddaði hann kynfæri hennar innanklæða og hætti því rétt áður en þau komu á áfangastað. Lífsýni sem tekin voru staðfesta að Abdul snerti hana.

Abdul bar það fyrir sig að hann hafi aðeins verið að reyna að hjálpa henni og að kanna lífsmörk hennar. Dómurinn mat hans ýmsu útskýringar á málavöxtum fjarstæðukenndar og misvísandi. Þá segir að Abdul hafa leitast við að fegra hlut sinn með vísan til þess að hann hefði allan tímann verið að aðstoða brotaþola.

„Í ljósi framangreinds verður að telja framburð ákærða einstaklega ótrúverðugan auk þess að hafa verið á reiki. Verður á engan hátt fallist á þær ástæður sem hann hefur nefnt fyrir því hvers vegna hann snerti brotaþola og að hann hafi hugsanlega snert hana óviljandi,“ segir í dómi héraðsdóms.

Fékk dótturina í fangið hágrátandi

Faðir konunnar bar vitni um það þegar hún kom heim til hans og móður hennar um nóttina. Hjónin vöknuðu við það að dyrabjöllunni var hringt með látum og þegar faðirinn opnaði fékk hann dóttur sína í fangið gersamlega í rusli og hágrátandi, líkt og haft er eftir honum í dómnum. 

Þá segir faðirinn að hún hafi ekki getað komið upp orði í fyrstu.

„Hefði hún náð að lýsa því að hún hefði verið í leigubifreið og bílstjórinn hefði káfað á henni. Honum og móður hennar hefði brugðið mikið, hann farið með brotaþola afsíðis, reynt að fá fram nánari lýsingu frá henni og síðan hringt í 112 og sagt frá því sem hafði komið fyrir en það hefði þá enn verið óskýrt. Brotaþoli hefði þá lýst bifreiðinni og sagt að bílstjórinn hefði ekki talað íslensku,“ segir í dómnum um vitnisburð föðurins.

Brást trausti sem leigubílstjóri

Fram kemur að konan hafi gefið þrjár skýrslur í kjölfar atviksins og að framburður hennar hafi verið stöðugur í gegnum meðferð málsins. Dómurinn segir að brot Abdul hafi verið gróft og að hann hafi notfært sér slæmar aðstæður konunnar.

„Brot ákærða var gróft, hann notfærði sér slæmar aðstæður brotaþola og ungan aldur og það traust sem hún bar til hans vegna stöðu hans sem leigubifreiðastjóri. Með brotinu, sem hafði alvarlegar afleiðingar fyrir brotaþola, beitti hann brotaþola grófu ofbeldi og braut gegn kynfrelsi hennar.

Með vísan til framangreinds og sakarefnis málsins þykir refsing ákærða hæfilega ákveðin fangelsi í tvö ár. Í ljósi alvarleika brotsins er ekki efni til að skilorðsbinda refsingu ákærða,“ segir meðal annars í niðurstöðu dómsins.