Á meðgöngu er mikilvægt að huga að góðri næringu, en hún stuðlar að vexti og þroska barnsins í móðurkviði og leggur grunninn að heilbrigði barnsins síðar á ævinni. 

Samkvæmt ráðleggingum á vef Heilsuveru þurfa barnshafandi konur ekki sérfæði heldur á venjulegur matur, fjölbreyttur og hollur samkvæmt ráðleggingum, að fullnægja bæði þörfum barnsins og móðurinnar. 

Það eru þó fáeinar undantekningar á þessu, en mælt er með því að barnshafandi konur forðist ákveðin matvæli á meðgöngunni.

Matvæli sem barnshafandi konum er ráðlagt að neyta ekki á meðgöngu:

• Hrár fiskur, t.d. grafinn fiskur, kaldreyktur fiskur, sushi með fiski, súrsaður hvalur og hákarl. 
• Þorskalifur
• Sverðfiskur
• Stórlúða
• Hráar baunaspírur
• Ógerilsneydd mjólk og ostar eða aðrar mjólkurafurðir úr ógerilsneyddri mjólk
• Hrátt kjöt
• Hrá egg
• Fýll og fýlsegg

Fæðutegundir sem barnshafandi konum er ráðlagt að neyta í hófi og ekki oftar en einu sinni í viku:

• Túnafisksteik
• Búri
• Niðursoðinn túnfiskur
• Svartfulsegg
• Hrefnukjöt