Ný hönnun hefur litið dagsins ljós hjá Heklu Björk Guðmundsdóttur listakonu og hönnuði, en hönnun hennar undir merkinu Heklaislandia hefur notið mikilla vinsælda og löngu orðin þekkt hér á landi og víðar. Mói skálar eru glæný hönnun og eru í anda þess sem hún hefur verið að hanna gegnum tíðina.

Fyrstu vör­urnar henn­ar komu árið 1996 síðan þá hef­ur bæst jafnt og þétt við fal­lega hönn­un henn­ar, sem Íslend­ing­ar hafa fengið að njóta allt árið um kring. Hún sæk­ir inn­blást­ur í villta flóru, dýra­líf og nátt­úru Íslands sem skil­ar sér vel í hönn­un henn­ar fyr­ir hverja árstíð og líka þegar það kem­ur að jól­un­um.

Hér er hvít keramikskál með loki með móa og kind á toppnum sem má segja að hafa verið fyrsta hugmynd Heklu á útliti skálarinnar. Ljósmynd/Aðsend

Innblásturinn alveg frá árinu 1996

„Innblásturinn af Móa skálunum er alveg frá árinu 1996 þegar ég mótaði keramikskál með loki sem var með móa og kind á toppnum. Það tekur mig alltaf tíma að koma hugmynd í framkvæmd en þessi hugmynd tók extra langan tíma,“ segir Hekla og brosir.

„Mói er náttúruundur sem ég hef heillast af allt frá barnæsku og kemur hann oft fram í málverkum mínum, en nú hef ég sett hann í þrívíddar form í glænýrri hönnun minni, Mói skálar.“

Móinn er einfaldaður og stílfærður á einstakan fallegan hátt, en skálarnar koma bæði eingöngu með móa á loki og móa loki með kind, lóu eða krumma á toppnum. Þær koma í þremur litum hvítar, svartar og brúnar.

Skálarnar er hægt að nota á ýmsan hátt, til að geyma bestu konfektmolana, lítil leyndarmál, góðar minningar, við kaffikönnuna, lyklakippuna eða bara til að fegra eldhúsið og heimilið. 

Skálarnar koma í þrem litum, hvítar, svartar og brúnar. Ljósmynd/Aðsend

Móa skálarnar má líka fá í tveimur stærðum. Kindin, krumminn og lóan hafa verið áberandi í hönnun Heklu. Ljósmynd/Aðsend

Krumminn fær líka að njóta sín. Ljósmynd/Aðsend

Skálarnar hafa skírskotun í íslenska náttúru, móann. Ljósmynd/Aðsend