Lopapeysa Völu Garðarsdóttur fornleifafræðings vakti mikla athygli í Spursmálum á dögunum en peysan er frá Færeyjum. Vala býður sig fram í komandi alþingiskosningum fyrir Framsóknarflokkinn í Suðvesturkjördæmi. 

„Þessa peysu fékk ég í gjöf frá mömmu minni og pabba fyrir einhverjum árum. Hún er prjónuð í Færeyjum af stelpunum í Gudrun/Gudrun,“ segir Vala og bætir við að merkið hafi ekki verið orðið svona stórt þegar móðir hennar keypti peysuna.

„Hún sá þessa peysu, eða álíka, í dönsku þáttunum Glæpurinn eða Forbridelsen og vildi endilega gefa mér eins. En ég nota hana mjög mikið og hef gert í mörg ár og á gráa, svarta og hvíta líka. Svo átti ég svona hvíta og svarta sem hvarf. Ég sem sagt elska lopapeysur.“