Volker Turk, mann­rétt­inda­full­trúi Sam­einuðu þjóðanna, seg­ir að við þær póli­tísku breyt­ing­ar sem séu að eiga sér stað í Sýr­landi, þar sem Bash­ar al-Assad Sýr­lands­for­seta hef­ur verið steypt af stóli, þá verði að gera upp þá glæpi og mann­rétt­inda­brot sem hann og aðrir und­ir hans stjórn bera ábyrgð á.

Þetta sagði Turk við blaðamenn í Genf í Sviss í dag.

Hann seg­ir nauðsyn­legt að gögn­um verði safnað sam­an og þau varðveitt. Hann seg­ir að Assad og aðrir hátt­sett­ir emb­ætt­is­menn séu grunaðir um ódæðis­verk í valdatíð sinni.

Volker Turk. AFP/​Khaled Desouki

Stjórn­in féll á 11 dög­um

Assad flúði til Rúss­lands eft­ir að sveit­ir íslamskra upp­reisn­ar­manna nálguðust höfuðborg­ina Dam­askus. Falli ein­ræðis­stjórn­ar Assads var fagnað víða um landið en hann stjórnaði land­inu með harðri hendi.

Rík­is­stjórn Assads féll aðeins 11 dög­um eft­ir að upp­reisn­ar­menn­irn­ir hófu að sækja fram í land­inu, sem kom flest­um að óvör­um. Árið 2011 brut­ust út mót­mæli í Sýr­landi sem beind­ust gegn stjórn­völd­um sem leiddu til borg­ara­styrj­ald­ar. Und­an­far­in ár hef­ur ástandið verið nokkuð stöðugt, eða þar til nú.

Lands­menn hafa fagnað falli Assads for­seta. AFP

Hálf millj­ón lát­ist af völd­um stríðsátaka

Á þess­um 13 árum hafa yfir 500.000 manns látið lífið og hef­ur um helm­ing­ur þjóðar­inn­ar flúið heim­ili sín.

Turk seg­ir að al­var­leg­ustu mann­rétt­inda­brot­in varði pynt­ing­ar og notk­un efna­vopna.

Turk von­ast til þess að þessi snöggu um­skipti leiði til já­kvæðra breyt­inga í land­inu og að yf­ir­völd geti byggt framtíð á grund­velli mann­rétt­inda, frels­is og rétt­læt­is.

Hann bætti við að það væri mik­il­vægt að taka skipu­lag ör­ygg­is­mála al­gjör­lega í gegn í land­inu.