Augusta Akpoghene Ólafsson matreiðslumeistari hefur loks látið draum sinn rætast og opnað nýjan ítalskan veitingastað í hjarta borgarinnar. Staðurinn ber heitið Ristorante Piccolo og er staðsettur á Laugavegi 11, þar sem ítölsk matargerð er í fyrirrúmi.

Piccolo Ristorante er staðsetttur á Laugavegi 11. mbl.is/Eyþór

Augusta stundaði matreiðslunám við Syddank Erhervsskole Vejle árið 2015 og Aarhustech frá 2015 til 2018. Hún vann í fjögur ár á ítölskum veitingastað í Árósum í Danmörku þar sem hún bætti við kunnáttu sína í ítalskri matargerð.

Eftir heimkomuna til Íslands stundaði Augusta meistaranám í matreiðslu við Menntaskólann í Kópavogi, Hótel og matvælaskólann á árunum 2022-2023. Árið 2023 tók Augusta stórt skref á sínum ferli með því að opna fyrsta veitingastaðinn sinn, sem markaði nýjan kafla í matreiðsluferð hennar.

Þýðir í raun lítill veitingastaður

Hvaðan kemur nafnið á staðnum?

„Mig hefur alltaf langaði í lítinn, kósí stað eins og þennan og Ristorante Piccolo þýðir í rauninni lítill veitingastaður,“ segir Augusta.

Augusta á heiðurinn af matseðlinum og þróaði alla réttina sjálf.

„Helstu áherslurnar í matargerðinni er ítalskur matur og eftirréttir. Á matseðlinum má finna margt sem hin margrómaða ítalska matreiðsluhefð hefur upp á að bjóða,“ segir Augusta og bætir við: „Réttirnir eru framleiddir úr því besta árstíðabundna og innlenda hráefni sem völ er á hverju sinni: Allt frá handgerðum pasta, gómsætum pítsum til eftirrétta.“

Í módernískum stíl sveipaður rómantík

Mikið hefur líka verið lagt í hönnunina á staðnum og fékk Augusta arkitektinn Elmu Klöru Þórðardóttur hjá Yrki arkitektum til að hanna útlitið á staðnum.

„Hér er á ferðinni módernískur ítalskur staður, þar sem áhersla var lögð á einfalda og stílhreina hönnun í efnis- og litavali,“ segir Augusta sem er afar ánægð með útkomuna.

Staðurinn er hannaður í módernískum stíl. Einfaldar innréttingar, stílhreinar línur og innrömmuð list bæta við nútímalegum blæ. mbl.is/Eyþór

Piccolo býður gestum upp á fallega blöndu af nútímalegum glæsileika og ítalskri hlýju. Rýmið býr yfir fágaðri litatöflu af jarðlitum og mjúkri umhverfislýsingu sem skapar notalegt en fágað andrúmsloft. Einfaldar innréttingar, stílhreinar línur og innrömmuð list bæta við nútímalegum blæ. Með vandlega útfærðum smáatriðum býður Piccolo upp á umhverfi sem er eins aðlaðandi og matseðillinn.

Boðið er upp á spennandi samsetta matseðla þar sem hver diskur er vitnisburður um ástríðu kokksins. „Upplifunin eykst með víðtækum vínlista með úrvals ítölskum vínum, faglega valin til að fullkomna máltíðina.“

„Ég hugsa um Piccolo Ristorante sem hið fullkomna umhverfi fyrir rómantískt kvöld, sérstaka viðburði eða einfaldlega til að gera sér dagamun. Mín ósk er að matargestir uppgötvi hjarta ítalskrar matargerðar í miðborg Reykjavíkur á stað þar sem hver biti er ferð til Miðjarðarhafsins,“ segir Augusta að lokum og hlakkar mikið til að taka á móti gestum framtíðarinnar og blómstra í eldhúsinu.

Huggulegheit eru í forgrunni. mbl.is/Eyþór

Stílhreint og fágað yfirbragð. mbl.is/Eyþór